کارڈف۔29 جولائی (سیاست ڈاٹ کام ) پاکستان کے دنیا بھر کے سفارتی تعلقات ہیں تاہم اسرائیل کے ساتھ تعلقات نہیں ہے، پاکستان کی فٹبال ٹیم کے پلیئرز اسرائیلی کھلاڑی ایک دوسرے سے گلے ملے لیکن مقابلے میں کراری شکست دی۔ دونوں ٹیموں کے درمیان یہ میچ برطانوی علاقے ویلز کے شہرکارڈف میں کھیلا گیا، جہاں بے گھر افراد کا فٹبال ورلڈکپ کھیلا جا رہا ہے۔ یہ محض کھیل نہیں بلکہ بے گھروں کا ورلڈ کپ مشکل حالات میں گھرے ان کھلاڑیوں کی زندگیوں پر بھی مثبت اثرات مرتب کر رہا ہے۔17 ویں ہوم لیس ورلڈ کپ میں پچاس ممالک کے 500 کھلاڑی حصہ لے رہے ہیں۔ 27 جولائی کو شروع ہوا یہ ورلڈکپ 7 دن جاری رہے گا۔ ایونٹ کے دوران جرمنی اور کئی دیگر ترقی یافتہ ممالک کی بے گھر افراد کی ٹیموں سے لے کر پاکستان، ہندوستان سمیت پچاس سے زائد ممالک کی ٹیمیں شامل ہیں۔ ویمنز ورلڈ کپ کیلئے 16ممالک کی ٹیموں کو 2 گروپوں میں تقسیم کیا گیا ہے جبکہ مردوں کے ورلڈ کپ کے 44 ممالک پر مشتمل ٹیمیں آٹھ گروپوں میں منقسم ہیں۔ گروپ ای میں پاکستان اور اسرائیل سمیت چھ ممالک کی ٹٰیمیں شامل ہیں، تین ٹیمیں اگلے راؤنڈ کے لیے کوالیفائی کریں گی۔ دیگر ٹیموں میں فرانس، پرتگال، ہنگری اور شمالی آئرلینڈ مد مقابل ہیں۔پاکستان نے پہلا میچ اسرائیل کیخلاف کھیلا اور حریف ٹیم کو شکست دی۔ ان مقابلوں کا دورانیہ 14 منٹ ہے اور پاکستان نے پہلے ہاف میں 2 کے مقابلے میں 4 گول سے سبقت حاصل کر لی تھی۔ دوسرا ہاف شروع ہوا تو اسرائیلی کھلاڑیوں نے تیسرا گول کر دیا تو دکھائی دیا کہ مقابلہ سخت ہوگا لیکن اسی دوران پاکستان نے پانچ مزید گول کر کے مقابلہ 9-4گول سے جیت لیا۔گروپ ایچ میں شامل جرمن ٹیم کو اپنے پہلے میچ میں لیتھوانیا کے خلاف شکست کا سامنا کرنا پڑا۔ ہندوستانی ٹیم بوسنیا ہرزیگوینا کے خلاف 3-2 گول سے شکست کھا گئی۔
