ممبئی ۔ /10 ڈسمبر (سیاست ڈاٹ کام) ہندوستانی کرکٹ ٹیم اپنی ناقص فیلڈنگ پر قابو پاتے ہوئے کل یہاں کھیلے جانے والے فیصلہ کن ٹی 20 مقابلہ میں ویسٹ انڈیز کیخلاف کامیابی کے ساتھ سیریز اپنے نام کرنے کی خواہاں ہے ۔ دوسری جانب ویسٹ انڈیز کرکٹ ٹیم جس نے گزشتہ مقابلہ میں تمام شعبوں میں شاندار مظاہرہ کرتے ہوئے ہندوستان کو شکست دیتے ہوئے سیریز کو 1-1 سے برابر کیا ہے ۔ حیدرآباد میں کھیلے گئے ابتدائی مقابلہ میں دونوں ہی ٹیموں نے خاص کر بیٹنگ میں بہترین مظاہرہ کرتے ہوئے 200 سے زائد رنز کا اسکور بنایا تھا جبکہ گزشتہ مقابلہ میں ہندوستانی ٹیم ناقص فیلڈنگ کی وجہ سے 170 رنز کا دفاع کرنے میں ناکام رہی ۔ ہندوستانی کرکٹ ٹیم کے کپتان ویراٹ کوہلی نے فیصلہ کن مقابلہ سے قبل کھلاڑیوں کو انتباہ دینے کے انداز میں واضح کیا ہے کہ فیلڈنگ پر توجہ دینے کی ضرورت ہے ۔ دوسری جانب کیرن پولارڈ کی قیادت میں پہلی مرتبہ عالمی چمپئین ویسٹ انڈیز ہندوستان کے خلاف سیریز میں شرکت کررہی ہے اور اسے کل یہاں کامیابی کے ساتھ ایک تاریخ رقم کرنے کا موقع ہے لیکن ہندوستان کو گھریلو وکٹوں پر شکست دینا آسان نہیں ہوگا ۔
