۔ 192 کے منجملہ 184 ووٹ حاصل ، آٹھویں مرتبہ اعزاز ،دو سالہ میعاد پر جنوری سے عمل
اقوام متحدہ ۔18 جون (سیاست ڈاٹ کام) ہندوستان کو آج 2021-22ء کیلئے ایشیاء پیسیفک زمرے سے اقوام متحدہ کی 15 رکنی سلامتی کونسل (یو این ایس سی) کا غیر مستقل ممبر منتخب کر لیا گیا۔یہ آٹھواں موقع ہے جب ہندوستان کو یو این ایس سی کیلئے منتخب کیا گیا ہے ۔اس نشست کیلئے منتظر سات ممالک کے درمیان ، ہندوستان کا 2021-22ء کی مدت کیلئے بلا مقابلہ انتخاب عمل میں آیا۔ یہ آٹھواں موقع ہے جب ہندوستان توسیعی سلامتی کونسل کیلئے چنا گیا ہے ۔اقوام متحدہ میں ہندوستان کے مستقل مشن نے ٹویٹ کیا ہے کہ “ممبر ممالک نے بھاری حمایت کیساتھ 2021-22ء کی مدت کیلئے سلامتی کونسل کی غیر مستقل نشست پر ہندوستان کا انتخاب کیا ہے ۔ ہندوستان کو 192 ووٹوں میں سے 184حاصل ہوئے ۔”ہندوستان کو امید ہے کہ وہ اقوام متحدہ کی سلامتی کونسل میں مستقل رکنیت کے لئے اپنی آٹھویں میعاد سے مثبت استفادہ کرے گا ، جس کیلئے جاپان ، جرمنی اور برازیل جیسے دوسرے دعویداربھی ہیں۔ہندوستان 1950-51 ء ، 1967-68ء ، 1972-73ء ، 1977-78ء ، 1984-85، 1991-92ء اور حال ہی میں 2011-12ء میں کونسل کے غیر مستقل ممبر کے طور پر منتخب ہوا ہے ۔اس ماہ کے شروع میں ، وزیر خارجہ ایس جئے شنکر نے ہندوستان کی سلامتی کونسل میں ایک اور میعاد کے تعلق سے ترجیحات اور نقطہ نظر پیش کرتے ہوئے کہا تھا کہ “عصری حقائق کی عکاسی کیلئے اصلاحی کثیرالجہتی”ہندوستان کی ترجیحات میں شامل ہوگا۔سلامتی کونسل کے ہر نئے ممبر کو ڈالے گئے ووٹوں کا دو تہائی جیتنے کی ضرورت ہوتی ہے ۔ یعنی اگر تمام 193 ممالک ووٹ دیتے ہیں تو 128 ووٹ لازمی ہیں۔ مندوبین کو فاتح کی تصدیق کیلئے متعدد بار ووٹ دینا پڑسکتے ہیں۔اقوام متحدہ کی سلامتی کونسل (یو این ایس سی) کے 15 ارکان ہیں۔ ان میں سے پانچ مستقل اور 10غیر مستقل ممبر ہیں۔مستقل اراکین امریکہ ، روس ، برطانیہ ، فرانس اور چین کو “P-5” کہا جاتا ہے ۔آدھے غیر مستقل ممبران کا انتخاب ہر سال ، یکم جنوری سے ، دو سال کی مدت کیلئے ہوتا ہے ۔کورونا وائرس کی وباء کے پیش نظر ارکان نے ماسک لگاکر اور سماجی فاصلے کی برقراری کے ساتھ ووٹنگ میں حصہ لیا۔ ہندوستان کے ساتھ آئرلینڈ ، میکسیکو اور ناروے نے بھی آج ہوئے سکیورٹی کونسل کے انتخابات میں کامیابی حاصل کی ہے۔