ممبئی۔26؍مئی (ایجنسیز) ہندوستان نے عالمی سطح پر ایک اور سنگ میل عبور کر لیا ہے۔ انٹرنیشنل مانیٹری فنڈ (آئی ایم ایف) کی تازہ رپورٹ کے مطابق، ہندوستان اب دنیا کی چوتھی سب سے بڑی معیشت بن چکا ہے۔ رپورٹ میں بتایا گیا کہ ملک کی مجموعی گھریلو پیداوار (جی ڈی پی) اب 4.19 ٹریلین امریکی ڈالر تک پہنچ چکی ہے جس کے بعد ہندوستان نے جاپان کو پیچھے چھوڑ دیا ہے۔اس شاندار کامیابی کا اثر ملک کے مالی بازاروں پر بھی نمایاں طور پر دکھائی دیا۔ ویک اینڈ کے بعد پیر 26 مئی کو مارکیٹ کھلتے ہی زبردست جوش و خروش کا ماحول دیکھا گیا۔ سرمایہ کاروں میں نئی امید اور اعتماد نظر آیا۔پیر کی صبح 9.09 بجے کے پری-اوپننگ ڈیٹا کے مطابق، سینسیکس 207.88 پوائنٹس کے اضافہ کے ساتھ 81,928.95 پر نظر آیا جبکہ نفٹی 66.20 پوائنٹس اوپر جا کر 24,919.35 پر ٹریڈ کر رہا تھا۔کچھ ہی دیر بعد مارکیٹ نے مزید رفتار پکڑی۔ سینسیکس 643.68 پوائنٹس (0.79 فیصد) بڑھ کر 82,364.76 پر پہنچ گیا جبکہ نفٹی 193.20 پوائنٹس (0.78 فیصد) کی تیزی کے ساتھ 25,046.35 پر ٹریڈ کر رہا تھا۔مارکیٹ میں اڈانی گروپ کے شیئرز نے بھی دھماکے دار آغاز کیا۔ اڈانی انٹرپرائزز، اڈانی ٹوٹل گیس، اڈانی گرین انرجی، اور اڈانی انرجی سولیوشنز کے شیئرز میں 1 فیصد سے زیادہ تیزی دیکھی گئی۔یہ بات بھی قابل ذکر ہے کہ جمعہ 24 مئی کو بھی بازار نے شاندارکارکردگی دکھائی تھی۔ سینسیکس 769.09 پوائنٹس اضافہ کے ساتھ 81,721.08 پر بند ہواتھا جبکہ نفٹی 243.45 پوائنٹس کی تیزی کے ساتھ 24,853.15 پر بند ہوا۔معاشی ماہرین کے مطابق ہندوستان کی معیشت میں یہ پیش رفت عالمی سرمایہ کاروں کے اعتماد کو مزید مضبوط کرے گی۔ خاص طور پر انفراسٹرکچر، توانائی اور ٹیکنالوجی کے شعبے میں مثبت اثرات مرتب ہونے کی امید ہے۔
