نئی دہلی، 30 اکتوبر(یو این آئی) کامرس اور صنعت کے مرکزی وزیر پیوش گوئل نے آج ’ہندوستان کا ڈیپ ٹیک مومنٹ:ڈیجیٹل قیادت سے تکنیکی خودمختاری تک‘کے موضوع پر ٹائی ایکون (دی انڈس انٹرپرینیورز) کانفرنس سے خطاب کرتے ہوئے اس بات پر زور دیا کہ ہندوستان کیلئے اپنی ٹیکنالوجیز تیار کرنا اور کلیدی معلومات کے لیے مخصوص جغرافیائی علاقوں پر زیادہ انحصار کو کم کرنا بہت ضروری ہے ۔ انہوں نے کہا کہ سودیشی کا جذبہ نہ صرف ہندوستان سے بنانے ، ڈیزائن کرنے یا خدمت کرنے کے بارے میں ہے ، بلکہ تیزی سے غیر متوقع عالمی ماحول میں طویل مدتی ترقی ، خودمختاری اور سلامتی کو یقینی بنانے کے بارے میں ہے ۔ گوئل نے کہا کہ ہندوستان نے ایک قوم کے طور پر دنیا کے بیک آفس یا سافٹ ویئر فراہم کنندہ ہونے سے ہٹ کر اختراع کے عالمی انجن کے طور پر ابھرکر سامنے آنے کا عزم کیا ہے جو مستقبل کیلئے نئے خیالات ، مصنوعات اور ٹیکنالوجی کو آگے بڑھائے گا۔ گوئل نے حالیہ عالمی رکاوٹوں سے حاصل ہونے والے اسباق پر روشنی ڈالی ، گوئل نے لچکدار سپلائی چین ، مقامی اختراع اور اہم ٹیکنالوجیز پر قابو پانے کی اہمیت پر زور دیا۔