ممبئی۔ 8 ڈسمبر (سیاست ڈاٹ کام) ہندوستانی خاتون انڈر 17 فٹبال ٹیم تھائی لینڈ اور سویڈن کے خلاف سہ رخی بین الاقوامی ٹورنمنٹ کھیلے گی جس کا 13 ڈسمبر کو آغاز ہورہا ہے۔ یہ مقابلے آئندہ برس منعقد شدنی فیفا انڈر 17 ورلڈ کپ کی تیاری کا حصہ ہے۔ فیفا انڈر 17 ورلڈ کپ کا انعقاد بھی ہندوستان ہی میں ہورہا ہے۔ آل انڈیا فٹبال فیڈریشن نے کہا ہے کہ 13 تا 19 ڈسمبر منعقد شدنی مذکورہ ٹورنمنٹ اس زمرے میں ہندوستان کا پہلا بین الاقوامی ٹورنمنٹ ہوگا۔ جاری بیان میں کہا گیا ہے کہ فیفا ویمن انڈر 17 ورلڈ کپ 2020ء کی تیاریوں کیلئے یہ فٹبال ٹورنمنٹ کھیلا جارہا ہے اور ممبئی میں منعقد شدنی اس ٹورنمنٹ کو کامیاب بنانے کے لئے تمام تر تیاریاں تیزی سے جاری ہیں۔ 13 ڈسمبر کو ہندوستان پہلا مقابلہ سویڈن سے اور 17 ڈسمبر کو تھائی لینڈ سے دوسرا مقابلہ کھیلے گا۔
