نئی دہلی: ہندوستان میں عید کا چاند نظر آ گیا ہے اور ملک بھر میں کل یعنی پیر31 مارچ کو عید الفطر منائی جائے گی۔ مختلف ریاستوں سے ملنے والی اطلاعات کے مطابق کئی مقامات پر رویت ہلال کمیٹیوں اور علمائے کرام نے چاند نظر آنے کی تصدیق کی ہے۔عید الفطر رمضان المبارک کے اختتام پر منایا جانے والا ایک اہم اسلامی تہوار ہے جو روزوں کے بعد شکرانے اور مسرت کا دن ہوتا ہے۔ملک کے مختلف حصوں میں چاند دیکھنے کے لیے مقامی رویت ہلال کمیٹیاں شام کے بعد سے ہی سرگرم تھیں۔ دہلی، لکھنؤ، حیدرآباد، پٹنہ، ممبئی، کولکاتا، بنگلورو اور دیگر شہروں میں کمیٹیوں نے چاند دیکھنے کے بعد عید منانے کا اعلان کیا۔بازاروں میں عید کی تیاریوں کے پیشِ نظر آج رات دیر تک چہل پہل رہے گی۔ ملک بھر میں عید کے موقع پر سکیورٹی کے سخت انتظامات کیے گئے ہیں۔ مختلف شہروں میں پولیس اور مقامی انتظامیہ نے پرامن عید منانے کیلئے گشت بڑھا دی ہے۔ اس موقع پر کئی اہم شخصیات نے عوام کو مبارکباد پیش کی ۔
انہوں نے اس موقع کو بھائی چارے اور اتحاد کو مضبوط کرنے کا پیغام قرار دیا ہے۔
عیدکے موقع پر لوگ نئے کپڑے پہنتے ہیں اور عید گاہ یا مساجد میں نمازِ عید ادا کرتے ہیں اور ایک دوسرے کو مبارکباد دیتے ہیں۔
