لندن۔28 مئی(سیاست ڈاٹ کام) انگلش ٹیم کے آل راؤنڈر بین اسٹوکس نے ورلڈکپ میں ہندوستانی ٹیم کے جان بوجھ کر ہارنے کا انکشاف کرکے نیا تنازعہ شروع کیا ہے ۔برطانوی کرکٹر نے اپنی کتاب بین اسٹوکس آن فائر میں لکھا ہے کہ ورلڈ کپ میں انگلینڈ کے خلاف 338 رنز کے تعاقب میں ہندوستانی ٹیم کی طرزرسائی حیران کن تھی۔ خاص طور پر دھونی اور ویراٹ کوہلی نے بڑے اسٹروکس کھیلنے کے بجائے سنگلز پر زیادہ اکتفا کیا۔ صرف پانچ وکٹیں گری تھیں اگر وہ چاہتے تو باآسانی آخری اوورز میں بڑی ہٹنگ کرسکتے تھے لیکن ایسا دیکھنے میں نہیں آیا۔بین اسٹوکس نے لکھا ہے کہ وہ اس میچ میں انگلینڈ کو ہرا کر ورلڈکپ سے باہر کرسکتے تھے لیکن شاید سیمی فائنل میں پاکستان کا سامنا نہیں کرنا چاہتے تھے اس لیے میچ ہار کر نیوزی لینڈ سے کھیلنا ان کا منصوبہ تھا۔ پی سی بی نے اس معاملے پر تبصرہ سے گریزکیا ہے۔واضح رہے کہ 2019 کے ورلڈ کپ میں انگلینڈ نے ہندوستان کے خلاف اپنے میچ میں ٹاس جیت کر پہلے بیٹنگ کا فیصلہ کیا اور مقررہ 50 اوورز میں 337 رنز بنائے تھے جب کہ ہندوستانی ٹیم مقررہ پچاس اوورز میں پانچ وکٹوں کے نقصان پر 306 رنز ہی بنا سکی تھی۔ مبصرین اور شائقین نے بھی ہندوستانی بیٹسمینوں کی نشانے کے تعاقب کیلئے طرز رسائی پر سوال اٹھائے تھے۔
