کینبرا۔8 ڈسمبر (سیاست ڈاٹ کام) ہندوستان کی جونیر ویمن ٹیم کو سہ رخی ہاکی ٹورنمنٹ میں بالآخر شکست برداشت کرنی پڑی لیکن اس کے باوجود اس نے سرفہرست رہتے ہوئے خطاب پر قبضہ کرلیا۔ ہندوستان نے آسٹریلیا اور نیوزی لینڈ کے ساتھ کھیلی گئی سہ رخی سیریز کے آخری مقابلے میں آسٹریلیا کے خلاف 1-2 کی شکست برداشت کی، لیکن اس کے باوجود ہندوستان کو چار مقابلوں سے 7 نشانات حاصل ہوئے تھے اور وہ میزبان آسٹریلیا سے گول فرق کی بنیاد پر آگے تھی۔ نیوزی لینڈ کو ٹورنمنٹ میں تیسرا مقام حاصل ہوا ہے جیسا کہ اس نے چار مقابلوں سے تین نشانات ہی حاصل کئے ہیں۔ آسٹریلیا کے خلاف کھیلے گئے آخری مقابلے میں ہندوستان کے لئے گگن دیپ کور نے واحد گول بنایا اور یہ گول 53 ویں منٹ میں بنا۔ قبل ازیں آسٹریلیائی ٹیم نے مقابلہ کا بہتر آغاز کرتے ہوئے 15 ویں منٹ میں ہی ایبیگیل وِلسن کے گول کی بدولت سبقت حاصل کرلی جس کے بعد ہندوستان نے گول کرتے ہوئے مقابلے کو مساوی موقف میں لا کھڑا کیا تھا ، لیکن نوجوان کھلاڑی کے 56 ویں منٹ میں بنائے جانے والے گول کی بدولت مقابلے پر اپنی کامیابی کی مہر لگائی۔ ہندوستانی ٹیم کیلئے مقابلے کا پہلا مرحلہ کافی سخت رہا اور میزبان نے گول بنانے کے مواقع بناتے ہوئے مہمان ٹیم پر دباؤ بنائے رکھا۔
