ایشیا کپ کے میچ ریفری کو تبدیل نہ کرنے پر ٹورنمنٹ میں مزید کوئی مقابلہ نہ کھیلنے پاکستان کرکٹ بورڈ کا فیصلہ
دبئی، 15 ستمبر (ایجنسیز) پاکستان نے ایشیا کپ کے بقیہ میچز کھیلنے کیلئے شرط رکھ دی ہے اور واضح کیا اگر میچ ریفری اینڈی پائیکرافٹ (زمبابوے) کو نہیں ہٹایا گیا تو پاکستان کی ٹیم ایشیا کپ میں مزید کوئی میچ نہیں کھیلے گی۔ پاکستان نے انٹرنیشنل کرکٹ کونسل (آئی سی سی) کو میچ ریفری کے خلاف باضابطہ طور پر آگاہ کردیا۔ ذرائع کے مطابق پاکستان نے باضابطہ فیصلہ کرلیا ہے کہ میچ ریفری کے ہٹانے تک پاکستان ایشیا کپ میں بقیہ میچز نہیں کھیلے گا۔ چیئرمین پی سی بی اور ایشین کرکٹ کونسل کے بھی صدرنشین محسن نقوی نے سوشل میڈیا ویب سائٹ ’ایکس‘ پر لکھا کہ پی سی بی نے آئی سی سی کے پاس شکایت درج کرائی ہے۔ پی سی بی نے آئی سی سی کو بتایا کہ میچ ریفری نے آئی سی سی کے ضابطہ اخلاق اور ایم سی سی قوانین کی خلاف ورزی کی ہے۔ محسن نقوی کے مطابق پی سی بی نے مطالبہ کیا ہے کہ میچ ریفری کو فوراً ایشیا کپ سے ہٹا دیا جائے۔ ذرائع نے بتایا ہے کہ ایشین کرکٹ کونسل کی جانب سے ٹیم انڈیا پر جرمانہ عائد کئے جانے کا امکان ہے۔ واضح رہے کہ گزشتہ روز ایشیاکپ میں پاکستان کو شکست دینے کے بعد ہندوستانی ٹیم نے اسپورٹس مین اسپرٹ کی خلاف ورزی کرتے ہوئے پاکستانی کھلاڑیوں سے مصافحہ نہیں کیا۔ این ڈی ٹی وی کی رپورٹ کے مطابق میچ کے بعد پریس کانفرنس کرتے ہوئے بھارتی کپتان سوریا کمار یادو سے اس حوالے سے پوچھا گیا جس پر انہوں نے کہا کہ یہ اس لیے کیا گیا تاکہ پاکستان کو واضح پیغام جائے اور وہ پہلگام پر دہشت گرد حملے کو ذہن میں رکھیں۔ تاہم آئیڈیا ان کا نہیں تھا۔ این ڈی ٹی وی نے اپنی رپورٹ میں کہا کہ یہ ہیڈ کوچ گوتم گمبھیر تھے جنہوں نے کھلاڑیوں کو پاکستانی کرکٹرز سے ہاتھ ملانے سے منع کیا تھا۔ ترجمان پاکستان ٹیم کے مطابق ٹاس کے وقت بھی میچ ریفری نے کپتانوں سے ہاتھ نہ ملانے کی درخواست کی تھی۔ بعد ازاں، پاکستانی کپتان سلمان آغا نے بھی بھارتی طرزعمل کے خلاف احتجاجاً میچ کی اختتامی تقریب میں شرکت نہیں کی۔ علاوہ ازیں، ہندوستانی کپتان سوریا کمار یادیو کھیل میں سیاست کو لے آئے اور پاکستان کے خلاف جیت کو پہلگام واقعہ کے نام کر دیا تھا۔