کولمبو۔11 ستمبر (سیاست ڈاٹ کام ) سری لنکائی وزیر کھیل ہیرن فرنانڈو نے کہا ہے کہ کرکٹرز کو دورہ پاکستان سے روکنے میں ہندوستانی ہاتھ ہونے کی اطلاعات درست نہیں۔ سماجی رابطوں کی ویب سائٹ پر اپنے پیغام میں ہیرن فرنانڈو نے کہا کہ چند کھلاڑیوں نے 2009 دہشت گردوں کے حملہ کو پیش نظر رکھتے ہوئے پاکستان میں میچز کھیلنے سے انکار کیا، ان کے فیصلے کا احترام کرتے ہوئے دستیابی ظاہر کرنے والے کرکٹرز کو منتخب کرلیا، ایک مضبوط ٹیم میدان میں اتاریں گے، پاکستان کو ہوم گراؤنڈ پر شکست دینے کے لیے پر امید ہیں۔ یاد رہے کہ 10 سری لنکن کرکٹرز نے پاکستان آنے سے انکار کر دیا ہے۔ ان میں ونڈے کپتان ڈیموتھ کرونا رتنے، ٹی ٹوئنٹی کپتان لیستھ مالنگا، اینجیلو میتھیوز، سورنگا لکمل، اکیلا دھننجایا، دنیش چندیمل، دھننجیا ڈی سلوا، نیروشن ڈکویلا اور تھسارا پریرا شامل ہیں۔
