لیڈز۔8 جولائی (سیاست ڈاٹ کام ) ہندستان ورلڈکپ کی تاریخ میں پہلی مرتبہ سیمی فائنل میں نیوزی لینڈ سامنا کرے گا جبکہ دوسرے سیمی فائنل میں کرکٹ تاریخ کے دو روایتی حریفوں آسٹریلیا اور انگلینڈ کے درمیان مقابلہ ہوگا۔ہندستان اور نیوزی لینڈ کا سیمی فائنل مقابلہ کل مانچسٹر میں کھیلا جائے گا۔ دوسرے سیمی فائنل میں میزبان انگلینڈ کا مقابلہ آسٹریلیا سے 11 جولائی کو ایجبسٹن میں ہوگا۔ فائنل 14 جولائی کو لارڈز میدان میں کھیلا جائے گا۔ یہ 12 واں ورلڈ کپ ہے اور یہ پہلا موقع ہے جب ہندستانی ٹیم سیمی فائنل میں نیوزی لینڈ سے کھیلے گی۔ ہندستان کا اس ورلڈ کپ میں لیگ مرحلے میں نیوزی لینڈ کے ساتھ مقابلہ بارش کی وجہ سے منسوخ ہو گیا تھا اس طرح دونوں ٹیمیں میدان میں پہلی مرتبہ آمنے سامنے ہوں گی اور میچ بھی سیمی فائنل ہوگا۔ ہندستان ورلڈ کپ کے سیمی فائنل میں ساتویں مرتبہ پہنچا ہے جبکہ نیوزی لینڈ کی ٹیم آٹھویں مرتبہ سیمی فائنل میں پہنچی ہے۔دوسری طرف میزبان انگلینڈ کی ٹیم چھٹی مرتبہ سیمی فائنل میں پہنچی ہے۔ انگلینڈ کا آخری مرتبہ سیمی فائنل 1992 میں کھیلا تھا اور انگلینڈ نے اس طرح 27 سال کے طویل وقفے کے بعد سیمی فائنل میں جگہ بنائی ہے۔ پانچ مرتبہ کا چمپئن آسٹریلیا آٹھویں مرتبہ ورلڈ کپ کے سیمی فائنل میں پہنچا ہے۔آسٹریلیا اور انگلینڈ کے درمیان ورلڈ کپ کے سیمی فائنل میں 1975 کے پہلے ٹورنمنٹ میں مقابلہ ہوا تھا جس میں آسٹریلیا نے چار وکٹ سے کامیابی حاصل کر کے فائنل میں جگہ بنائی تھی۔ آسٹریلیا اور انگلینڈ 1987 کے ورلڈ کپ میں فائنل میں کھیل چکے ہیں اور اس مقابلے میں بھی آسٹریلیا نے انگلینڈ کو سات رنز سے شکست دی تھی۔
