کراچی۔2 اکٹوبر (سیاست ڈاٹ کام ) سری لنکائی وزیر کھیل ہیرن فرنانڈو نے کہا ہے کہ ایشیا کپ کیلئے اگر ہماری اور بنگلہ دیشی ٹیم پاکستان آ سکتی ہے تو ہندوستان کو بھی آنا چاہیے۔ ایک انٹرویو میں فرنانڈونے کہا کہ ایشیا کپ کیلئے سری لنکا اور بنگلہ دیش کی ٹیمیں پاکستان آنے کو تیار ہوں گی ایسے میں ہندوستان کو بھی آنا چاہیے تاہم یہ فیصلہ بی سی سی آئی کا ہی ہوگا میں اس پر زیادہ تبصرہ نہیں کر سکتا۔ایک سوال پر فرنانڈو نے کہا کہ دورے سے سری لنکن کرکٹرزکی ہچکچاہٹ پر ایک پاکستانی وزیر نے بیان دیا کہ ایسا آئی پی ایل معاہدوں کی وجہ سے ہو رہا ہے، درحقیقت ہندوستانی لیگ میں لسیتھ ملنگا کے سوا تو ہمارا کوئی کھلاڑی شریک ہی نہیں ہوتا، اس بیان سے بڑا تنازعہ کھڑا ہوگیا تھا۔ ہندوستانی ہائی کمشنر نے مجھ سے کہا کہ اس کی تردید کریں جو میں نے کردی، معاملہ کہیں سے کہیں جا رہا تھا اور سری لنکا درمیان میں سینڈوچ بن گیا، خیر خوش قسمتی سے مسئلہ حل ہو گیا۔ انہوں نے کہا کہ ہندوستان بھی ہمارے لیے بڑے بھائی کی طرح ہے اور ہم اس کے ساتھ اچھے تعلقات چاہتے ہیں، پاکستان نے بھی ہمیشہ ہماری مدد کی ہے، میں بھول نہیں سکتا کہ ہماری ٹیم نے لاہور میں ہی ورلڈکپ جیتا تھا۔
