نئی دہلی : ٹوکیو 2020 اولمپک کھیلوں کے شروع ہونے میں صرف 50 دن باقی ہیں ، ہندوستانی اولمپک اسوسی ایشن نے ہندوستانی دستے کے لئے ایک باضابطہ اور سرکاری کھیلوں کے شاندارلباسکا افتتاح کیا۔ یہ ہندوستانی دستہ 23جولائی سے 8اگست 2021ء تک جاپان کے ٹوکیو میں ہونے والے اولمپک کھیلوں میں حصہ لے گا۔ ٹوکیو 2020 اولمپک کھیلوں میں مرکزی وزیر برائے امور نوجوانان اورکھیل کرن رجیجو نے ہندوستانی ٹیم کے لئے سرکاری کٹ کی نقاب کشائی کی۔ اس موقع پر انڈین اولمپک اسوسی ایشن (آئی او اے ) کے صدر ڈاکٹر نریندر دھرو بترا اورسکریٹری جنرل راجیو مہتہ موجود تھے ۔اس تقریب میں وزارت نوجوانان کے امور وکھیل کے سکریٹری روی متل ، انڈیا اسپورٹ اتھارٹی کے ڈائریکٹر جنرل سندیپ پردھان، ہندوستانی دستہ کے شیف ڈی مشن بی پی ویشہ، رکن پارلیمنٹ اور ڈپٹی شیف ڈی مشن ڈاکٹر پریم چند ورما بھی موجود تھے ۔ وزیر کھیل کی رہائش گاہ میں منعقدہ تقریب میں اولمپک جانے والے کھلاڑی بجرنگ پنیا ، روی کمار ، دیپک پنیا ، سمت ، سیما بِسلا اور نیرج چوپڑا بھی موجود تھے ۔ آفیشل اسٹائل پارٹنر۔ ریمنڈ فارمل کٹس تقسیم کرے گا اور آفیشل اسپورٹس ملبوسات کا شراکت دار لی ننگ ٹوکیو آنے والے کھلاڑیوں کے لئے ٹریول اور اسپورٹس کٹس سمیت کھیل ملبوسات فراہم کرے گا۔لی ننگ نے ہندوستانی اولمپک ٹیم کی توانائی اور فخر کے اظہار کے لئے ہندوستانی قومی رنگوں اور مربوط منفرد گرافکس سے متاثر ہوکرکھیلوں کی سرکاری کٹ تیار کی ہے ۔ کٹ کا باضابطہ ڈیزائن انڈین اولمپک اسوسی ایشن نے ڈیزائنر ادیتری گوئل کی مدد اور تعاون سے تیارکیا ہے ۔
