نئی دہلی :پہلگام حملہ کے بعد ایک طرف ہندوستان نے پاکستان کو ’سخت جواب‘ دیتے ہوئے ’آپریشن سندور‘ انجام دیا ہے۔ ساتھ ہی بنگلہ دیش پر بھی شکنجہ کس دیا ہے جو کہ ہند۔پاک کے معاملے میں بیان بازیوں سے باز نہیں آ رہا۔ میڈیا کے مطابق چہارشنبہ کو ہندوستان نے 123 دراندازوں کو واپس بنگلہ دیش بھیج دیا ہے۔ ان میں بیشتر روہنگیا طبقہ سے تعلق رکھتے تھے۔ یہ درانداز سرحد پار کر کے ہندوستان کے الگ الگ حصوں میں پہنچ گئے تھے۔ دی ڈیلی اسٹار کی ایک رپورٹ کے مطابق ہندوستان نے 2 سرحدوں سے ان سبھی دراندازوں کو واپس بنگلہ دیش بھیجا ہے۔ ہندوستان کے اس قدم سے بنگلہ دیش میں ناراضگی ہے۔ بنگلہ دیش کا کہنا ہے کہ جس طرح سے انھیں ملک واپس بھیجا گیا ہے وہ طریقہ درست نہیں ہے۔ یونس حکومت میں داخلی امور کے مشیر خلیل الرحمن نے ڈھاکہ ٹریبیون سے بات کرتے ہوئے کہا کہ ہمارے لوگوں کو دھکا مار کر بھگایا گیا ہے۔خلیل الرحمن کے مطابق ہندوستان نے روہنگیا کو بھی واپس ہمارے ملک بھیج دیا ہے جبکہ روہنگیا بنگلہ دیشی نہیں ہیں۔ ان کا کہنا ہے کہ ہندوستان نے بغیر شناخت کیے سبھی 123 افراد کو سرحد پار سے دھکا مار کر بنگلہ دیش بھیج دیا ہے۔ روہنگیا اشخاص سے متعلق بنگلہ دیش پولیس نے کوئی بیان جاری نہیں کیا ہے۔
