ماریشس سپریم کورٹ کی عمارت کا افتتاح ،ویڈیو کانفرنسنگ کے ذریعہ وزیر اعظم کا خطاب
نئی دہلی؍ پورٹ لوئی : وزیراعظم نریندر مودی نے چین کا نام لئے بغیر اس کی قرض ڈپلومیسی پر حملہ کرتے ہوئے آج کہا کہ ’ترقیاتی پارٹنرشپ‘ کے نام پر ممالک کو ’ماتحت شراکت داری‘ کے لئے مجبور کیا گیا ہے جس سے نوآبادیاتی اور سامراجی حکمرانی مضبوط ہوئی ہے اور انسانیت کو نقصان اٹھانا پڑا ہے۔ مودی نے جمعرات کو ایک ویڈیو کانفرنسنگ کے ذریعہ ماریشس کے وزیراعظم پروندر جگناتھ کے ساتھ ہندوستان کے تعاون سے پورٹ لوئی میں تیار کردہ ماریشس کی سپریم کورٹ کی عمارت کے افتتاح کے موقع پر یہ تلخ تبصرہ کیا۔ انہوں نے یہ بھی کہا کہ ہندستان کی اس کے دوست ممالک کے ساتھ ترقیاتی شراکت داری احترام پر مبنی ہے۔ یہ کسی شرط یا کسی بھی سیاست یا تجارتی مفاد سے مربوط نہیں ہے۔ مودی نے مزید کہاکہ آج ہندستان اور ماریشس کے مابین خصوصی دوستی کے فیسٹول کا دن ہے۔ پورٹ لوئی میں سپریم کورٹ کی عمارت ہمارے تعاون اور مشترکہ اقدار کی علامت ہے۔ ہندستان اور ماریشس دونوں ممالک میں آزاد عدلیہ جمہوری نظام کے اہم ستون ہیں۔ وزیراعظم نے کہا کہ ہندوستان بحر ہند خطہ میں تمام کے لئے سلامتی اور ترقی کے ویژن ’ساگر‘ کے مرکز میں ماریشس ہی ہے ۔ انہوں نے کہاکہ ہندوستان ترقی یافتہ ہونا چاہتا ہے اور دیگر ممالک کو بھی ترقی کی ضرورتوں میں مدد کرنا چاہتا ہے۔ ترقی کے لئے ہندستان کا نقطہ نظر انسانیت پر مرکوز ہے۔ ہم انسانیت کی فلاح و بہبود کے لئے کام کرناچاہتے ہیں۔ انہوں نے کہاکہ ہندوستان ترقیاتی شراکت داری احترام، تنوع، مستقبل کا خیال اور پائیدار ترقی کے نشانوں کو مدنظر رکھ کر قائم کررہا ہے۔