دھرم شالہ ۔13 ستمبر (سیاست ڈاٹ کام ) جنوبی افریقہ کے کھلاڑی ریسی وین ڈیر ڈسین نے ہندستان کے خلاف ہونے والی ٹوئنٹی 20 سیریز سے پہلے کہا ہے کہ آئی پی ایل کا تجربہ ہندستان کے خلاف ان کی ٹیم کے کام آئے گا۔ جنوبی افریقہ کو ہندوستان کے خلاف تین ٹوئنٹی 20 میچوں کی سیریز کھیلنی ہے جس کا پہلا میچ 15 ستمبر کو دھرم شالہ میں کھیلا جائے گا۔ سیریز کی تیاری سے متعلق ڈسین نے کہا کہ کوئنٹن ڈی کاک اور ڈیوڈ ملر نے ہندوستان میں کافی کرکٹ کھیلی ہے۔ ہم ان سے یہاں کے حالات کے بارے میں معلوم کر رہے ہیں ، جس سے ہم ہندستان کے خلاف بہتر کارکردگی کا مظاہرہ کر سکیں۔جنوبی افریقہ کی ٹیم ڈی کاک کی قیادت میں ہندوستان کے خلاف کھیلنے کیلئے اترے گی جبکہ ڈسین ٹیم کے نائب کپتان بنائے گئے ہیں۔ انہوں نے کہا کہ ہم نے یہاں دو مشکل ٹریننگ سیشن گزارے ہیں اور ٹریننگ سیشن باقی ہیں۔ یہاں کافی گرمی ہے اور سیریز شروع ہونے سے ایک ہفتہ پہلے یہاں آنا ٹیم کے لئے فائدہ مند ثابت ہوگا۔ ڈی کاک کی کپتانی پر ڈسین نے کہا کہ ڈی کاک ایک شاندارکپتان ہیں۔ وہ زیادہ بات نہیں کرتے لیکن جب بولتے ہیں تو انتہائی متوازن اور ضرورت کے مطابق بات کرتے ہیں۔ انہوں نے جنوبی افریقہ کو کئی میچ جتوائے ہیں اور ٹیم میں سب ان کا احترام کرتے ہیں۔ مجھے یقین ہے کہ وہ ایک مضبوط کپتان ثابت ہوں گے۔ڈسین نے کہا کہ ہم نے یہاں کے ماحول کو دیکھا ہے۔ پچھلی مرتبہ جب ہم یہاں کھیلے تھے تو ہماری ٹیم نے ہندوستان کو سات وکٹوں سے شکست دی تھی۔ یہ پچ بیٹنگ کے لئے کافی اچھی ہے۔ باؤنڈری 65 میٹر کی ہے اور زیادہ بڑی نہیں ہے۔ ہمیں معلوم ہے کہ ہندوستان ایک مضبوط چیلنج ہے اور ہم اس کے لئے پوری طرح تیار ہیں۔ انہوں نے کہا کہ پچھلی مرتبہ جب ہم ورلڈ کپ میں کھیلے تھے اور وہاں ہماری کارکردگی مایوس کن رہی تھی لیکن اب ٹیم گزشتہ باتیں بھول کر نئی شروعات کرنے جا رہی ہے۔ ٹیم کا کوچنگ عملہ نیا ہے اور ہم نے ان سے ایک بہتر ٹیم کی حیثیت سے ابھر کر سامنے آنے کے بارے میں کافی بات چیت کی ہے۔ ٹیم میں کئی نئے کھلاڑی شامل ہوئے ہیں۔جنوبی افریقہ کھلاڑی نے کہا کہ ہندوستان دنیا کے مضبوط ترین ٹیموں میں سے ایک ہے اور خاص طور پر گھریلو میدان میں وہ آسان حریف نہیں ہوتی۔ انہوں نے حال ہی میں ویسٹ انڈیز کے خلاف سیریز کھیلی ہے۔ یہ ہمارے لئے فائدہ مند ثابت ہو سکتی ہے۔ ہم گزشتہ کچھ وقت سے میدان سے باہر ہیں اور کھلاڑیوں میں جوش ہے۔
