نئی دہلی، 24اگست (یو این آئی) فجی کے وزیر اعظم سیتونی لیگامامادا رابوکا کا اتوار کی صبح یہاں پہنچنے پر پرتپاک استقبال کیا گیا۔ تعلیم کی وزیر مملکت سکانتا مجمدار نے اندرا گاندھی بین الاقوامی ہوائی اڈے پر رابوکا اور ان کے وفد کا استقبال کیا۔ وزارت خارجہ کے ترجمان رندھیر جیسوال نے سوشل میڈیا پر ایک پوسٹ میں کہا کہ ‘‘فجی کے وزیر اعظم سیتونی رابوکا کا دہلی کے پہلے دورے پر پرتپاک خیرمقدم’’۔ وزیر اعظم رابوکا کا ہوائی اڈے پر شمال مشرقی خطہ کی تعلیم اور ترقی کی وزیر مملکت سکانتا مجمدار نے استقبال کیا۔ اس دورے سے دونوں ممالک کے درمیان مختلف شعبوں میں شراکت داری مزید مضبوط ہوگی۔ رابوکا کے ساتھ ان کی اہلیہ سلویتی رابوکا بھی ہیں۔ ان کے ساتھ آنے والے وفد میں صحت اور طبی خدمات کے وزیر رتو انتونیو لالبالاؤ اور سینئر افسران شامل ہیں۔ وزیر اعظم بننے کے بعد رابوکا کا ہندوستان کا یہ پہلا دورہ ہے ۔ وہ پیر کو وزیر اعظم نریندر مودی سے بات چیت کریں گے ۔ مودی معزز مہمان کے اعزاز میں ظہرانہ کا اہتمام کریں گے ۔ وزیر اعظم رابوکا صدر جمہوریہ دروپدی مرمو سے بھی ملاقات کریں گے ۔ وہ انڈین کونسل آف ورلڈ افیئرز میں ‘اوشین آف پیس’ پر لیکچر بھی دیں گے ۔ فجی کے وزیر اعظم کا یہ دورہ ہندوستان اور فجی کے درمیان دیرینہ اور پائیدار تعلقات کو اجاگر کرتا ہے ۔ یہ تمام شعبوں میں دوطرفہ تعلقات کو مزید مضبوط بنانے اور عوام کے درمیان قریبی تعلقات کو گہرا کرنے کیلئے دونوں ممالک کے مسلسل عزم کا اعادہ کرتا ہے ۔
