جنیوا: گلوبل ہنگر انڈیکس 2023 کے مطابق ہندوستان کے پڑوسی ممالک پاکستان، بنگلہ دیش، نیپال اور سری لنکا زیادہ بہتر پوزیشن میں ہیں۔ ہندوستان نے اقوام متحدہ کے ادارے ایف اے او کی رپورٹ کے معتبرہونے پر سوال اٹھائے ہیں۔اقوام متحدہ کے ادارے فوڈ اینڈ ایگریکلچر آرگنائیزیشن (ایف اے او) کے تازہ ترین گلوبل ہنگر انڈیکس میں کل 125ملکوں میں ہندوستان111 نمبر پر ہے۔ رپورٹ کے مطابق بھوک کے خلاف اس کی پیش رفت 2015 کے بعد سے تقریباً رک گئی ہے۔گلوبل ہنگر انڈیکس میں 100 پوائنٹ کے پیمانے پر صفر (0) یعنی کوئی بھوکا نہیں، بہترین اسکور اور 100بدترین اسکور ہے۔ اس انڈکس کی تیاری میں بھوک کی کثیر جہتی نوعیت کے چار اشاروں یعنی کم غذائیت، بچوں کی نشو و نما، بچوں میں لاغرپن اور بچوں کی شرح اموات کو مدنظر رکھا جاتا ہے۔ اس درجہ بندی میں 100پوائنٹ پر بھارت کا اسکور 28.7 ہے، جو بھارت میں بھوک کی’’سنگینی‘‘ کو ظاہر کرتا ہے۔
