نئی دہلی۔2 جون (سیاست ڈاٹ کام) پاکستان کے سابق کپتان اور فاسٹ بولر وقار یونس نے کہا ہے کہ ہندوستان اور پاکستان کے درمیان کرکٹ سیریز ہونی چاہئے اور دونوں ملکوں کے درمیان سیریز دنیا کی سب سے کامیاب سیریز ثابت ہوگی۔ہندوستان بمقابلہ پاکستان نے آخری بار 2012-13 میں دو طرفہ سریز کھیلی تھی جس کے بعد کچھ سیاسی کشیدگی کے سبب ہندوستان اور پاکستان کے کھیل رشتے صرف آئی سی سی اور کونٹی نینٹل ٹورنمنٹ تک سمٹ کر رہ گئے ہیں۔وقار نے گلوفینس کی سیریز کیو20 میں کرکٹ شائقین کے سوالات پر کہاکہ اگر آپ دونوں ملکوں میں جا کر کسی بھی کرکٹ پرستار سے پوچھیں گے کہ ہندوستان اور پاکستان کو آپس میں کھیلنا چاہیے تو تقریبا95 فیصد لوگ یہی کہیں گے کہ دونوں ملکوں کے درمیان کرکٹ ہونا چاہئے ۔ اس کا نام چاہے عمران۔کپل سریز بنا لیں یا انڈی پینڈنس سریز، یا پھر کچھ بھی نام دیا جائے ، وہ دنیا کہ سب سے کامیابکرکٹ سیریز ہوگی۔سابق پاکستانی کپتان نے ساتھ ہی کہا کہ ایسے میچ باقاعدہ طور پر ہونے چاہئے تاکہ کرکٹ شائقین اس سے محروم نہ رہیں ۔ انہوں نے کہاکہ میں ہندوستان اور پاکستان کو دو طرفہ سریز کھیلتے ہوئے دیکھتا ہوں۔ میں یہ نہیں بتا سکتا کہ میچ مقام کیا ہوگا لیکن یقینا شائقین یہ میچ اپنے اپنے ملک میں دیکھا جانا زیادہ پسند کریں گے ۔ لیکن اتنا ضرور ہے کہ آنے والے چند سال میں ہندوستان اور پاکستان کے درمیان دو طرفہ سریز ممکن ہے ۔یادر رہے کہ دونوں ممالک کے سیاسی تعلقات کشیدہ ہونے کی وجہ سے دونوں ٹیموں کے درمیان باہمی سیریز نہیں ہوتی ہے حالانکہ دونوں ہی ٹیموں آئی سی سی ایونٹ میں ایک دوسرے کے خلاف مقابلہ کرتے ہیں۔
