نیویارک ۔امریکہ کے شہر نیویارک میں کرکٹ اسٹیڈیم کی تعمیر آخری مراحل میں پہنچ گئی ہے جہاں 9 جون کو آئی سی سی ٹی ٹوئنٹی ورلڈ کپ میں ہندوستان اور پاکستان کا مقابلہ مقرر ہے۔ آئی سی سی ٹی ٹوئنٹی ورلڈ کپ 2024ء سے قبل نیویارک کا نساوکاؤنٹی انٹرنیشنل کرکٹ اسٹیڈیم تکمیل کے آخری مراحل میں پہنچ گیا ہے۔ اس حوالے سے آئی سی سی نے اسٹیڈیم کی تازہ ترین ویڈیو جاری کی ہے، اسٹیڈیم کے ایسٹ اور ویسٹ اسٹینڈز مکمل ہونے کے قریب ہیں جس میں 24 ہزار تماشائیوں کے بیٹھنے کی گنجائش ہے۔اس اسٹیڈیم میں ہندوستان کے تمام گروپ میچز کھیلے جائیں گے اور میگا ایونٹ کا سب سے بڑا مقابلہ روایتی حریف پاکستان اورہندوستان کے درمیان 9 جون کو اسی اسٹیڈیم میں ہوگا۔آئی سی سی کے ہیڈ آف ایونٹس کرس ٹیٹلے نے کہا ہے کہ خوشی ہے کہ تعمیراتی کام منصوبوں کے مطابق چل رہا ہے۔
