کراچی ۔5 نومبر (سیاست ڈاٹ کام ) انٹرنیشنل ٹینس فیڈریشن نے پاکستان اور ہندوستان کے درمیان رواں ماہ مقرر ڈیوس کپ مقابلوں کی تیسرے مقام پر منتقلی کا فیصلہ سناتے ہوئے پاکستان کو نئے مقام کے تعین کی ہدایت دی ہے۔ایشیا اوشیانا گروپ ون ٹائی 14 اور15 ستمبر کو اسلام آباد میں ہونے تھے لیکن سیکیورٹی وجوہات کے سبب انٹرنیشنل ٹینس فیڈریشن نے مقابلوں کو نومبر تک ملتوی کردیا تھا اور اب یہ میچز 29 اور 30 نومبرکو اسلام آباد میں منعقد نہیں ہوں گے۔ ہندوستان نے انٹرنیشنل ٹینس فیڈریشن سے درخواست کی تھی کہ دونوں ملکوں کے درمیان کشیدگی کے سبب ان مقابلوں کو کسی تیسرے مقام پر منتقل کردیا جائے۔ ڈیوس کپ کے مقامی کے حتمی تعین کے لیے فیصلہ تین نومبر کو آنا تھا اور ہندوستان نے ابتدائی طور پر اس مقابلے لیے ٹیم کا اعلان کرتے ہوئے ٹیم پاکستان بھیجنے کا فیصلہ کیا تھا۔ تاہم اب انٹرنیشنل ٹینس فیڈریشن نے ہندوستان کے حق میں فیصلہ دیتے ہوئے پاکستان کو یہ مچز تیسرے مقام پر منعقدکروانے کی ہدایت دی ہے۔ انٹرنیشنل ٹینس فیڈریشن نے اپنے بیان میں کہا کہ پاکستان ٹینس فیڈریشن کے پاس تیسرے مقام کا اعلان کرنے کا اختیار ہے اور ان کے پاس اس کے لیے پانچ دن ہیں۔ فیڈریشن نے اس فیصلے کی بنیاد سیکیورٹی کو بناتے ہوئے کہا ہے کہ ہمارے نزدیک ایتھلیٹس، عہدیداروں اور شائقین کی سیکیورٹی سب سے اہم ہے اور اسی بنیاد پر یہ فیصلہ کیا گیا ہے۔ ہندوستان نے ان مقابلوں کے لیے کمزور ٹیم پاکستان بھیجنے کا فیصلہ کیا تھا کیونکہ کپتان مہیش بھوپتی سمیت اہم کھلاڑیوں نے پاکستان جانے سے انکار کردیا تھا تاہم اب ممکنہ طور پر ہندوستان نئے اسکواڈ کا اعلان کرے گا۔ آل انڈیا ٹینس ایسوسی ایشن کے جنرل سیکریٹری ہیرونموئے چیٹرجی نے کہا کہ ہم مقام کی تبدیل کے فیصلے پر بہت خوش اور اس کا خیرمقدم کرتے ہیں، ہم پاکستان ٹینس فیڈریشن کی جانب سے نئے مقام کا اعلان کیے جانے کے منتظر ہیں اور اس کے بعد اپنی نئی ٹیم کا اعلان کریں۔
