لندن: روس سے بڑھتے تعلقات پر مغربی ممالک میں ہندوستان کے خلاف شدید تشویش پائی جاتی ہے جب کہ برطانوی اخبار نے دعویٰ کیا ہے کہ روس کے یوکرین پرحملے سے ہندوستان اور روس کے مثبت تعلقات پر کوئی اثر نہیں پڑے گا۔میڈیا نے کہا کہ ہندوستان یوکرین کے معاملے پر روس کے ساتھ جا کھڑا ہوا ہے، یہ کسی صورت بھی نیوٹرل پوزیشن نہیں، برطانوی وزیر اعظم ہندوستان کے ساتھ فری ٹریڈ ڈیل کر رہے ہیں، دوسری جانب ہندوستان روس کے عزائم کی حمایت کررہا ہے۔برطانوی اخبار نے کہا کہ برطانوی وزیر اعظم جہاں ہندوستان میں مودی سرکار کے ہاتھوں قتل عام اور انسانی حقوق کی سنگین خلاف ورزیوں پر چپ سادھے ہوئے ہے وہاں ہندوستان کا روس کی جانب جھکاو بڑھتا جارہا ہے۔رپورٹ میں کہا گیا ہے کہ مودی سرکار پارلیمنٹ کو استعمال کرکے ہندوستانی قوانین میں بڑی تبدیلیاں لارہی ہے جسے مسلمانوں اور اقلیتوں پر مظالم کی بدترین لہر آنے کا پیش خیمہ قرار دیا جارہا ہے۔برطانوی اخبار میں کہا گیا ہے کہ کانگریس کے ممبر پارلیمنٹ ششی تھرور نے مودی حکومت کے اقدامات کو ہندوستانی پارلیمانی جمہوریت کا جنازہ قرار دیا تھا۔