نئی دہلی ۔23 اگسٹ (سیاست ڈاٹ کام )ہندوستان اور پاکستان کے درمیان موجودہ کشیدہ تعلقات اور سیکیورٹی صورتحال کے سبب دونوں ملکوں کے درمیان ڈیوس کپ ٹینس مقابلے نومبر تک ملتوی کردئے گئے ہیں ۔ایشین اوشیانا گروپ ون کے مقابلے اسلام آباد کے پاکستان اسپورٹس کمپلیکس میں 14 اور 15 ستمبر کو منعقد ہونے تھے، جس میں شرکت کے لیے جولائی میں ہندوستان نے اپنی ٹیم پاکستان بھیجنے کی تصدیق بھی کی تھی۔ تاہم آرٹیکل 370 کے خاتمے کے بعد پاکستان نے ہندوستان کے ساتھ سفارتی تعلقات محدود کرنے کے علاوہ دوطرفہ تجارت معطل کرنے کے ساتھ سمجھوتہ اور تھر ایکسپریس سروس معطل کردی تھی اور دونوں ملکوں کے درمیان صورتحال کشیدہ ہے۔اس صورتحال کے پیش نظر ہندوستان نے انٹرنیشنل ٹینس فیڈریشن سے ڈیوس کپ کا مقام کسی اور ملک منتقل کرنے کا مطالبہ کیا تھا۔ اس مطالبے کے بعد انٹرنیشنل ٹینس فیڈریشن نے اپنے سیکیورٹی مشیروں کو صورتحال کا جائزہ لینے کی ہدایت دی تھی جنہوں نے ایونٹ کو ملتوی کرنے کا مشورہ دیا ہے۔ فیڈریشن کی جانب سے جاری بیان میں کہا گیا کہ آزاد ماہرین پر مشتمل سیکیورٹی مشیروں کی جانب سے پاکستان میں مکمل سیکیورٹی جائزے کے بعد ڈیوس کپ کمیٹی نے پاکستان اور ہندوستان کے درمیان اسلام آباد میں مقرر ایشیا اوشیانا گروپ 1 کے ٹائی کو ملتوی کردیا ہے۔ انٹرنیشنل ٹینس فیڈریشن کے مطابق کمیٹی نے حالات کو نامناسب قراردیا اور ہماری پہلی ترجیح کھلاڑیوں، عہدیداروں اورشائقین کی حفاظت ہے۔ ہندوستان اور پاکستان کے درمیان ڈیوس کپ ٹائی کو نومبر تک ملتوی کردیا گیا ہے اور کمیٹی 9 نومبر کے بعد حتمی تاریخ کا اعلان کرے گی لیکن اس سے قبل ایک مرتبہ پھر سیکیورٹی صورتحال کا جائزہ لیا جائے گا۔
