کلکتہ ۔18 جون ۔( سیاست ڈاٹ کام ) جونیر ڈاکٹروں کی ہڑتال ختم ہونے کے بعد ریاست کے تمام سرکاری اسپتالوں میں حالات معمول پرآگئے ہیں۔این آر ایس اسپتال میں مریض کی موت کے بعد ڈاکٹروں کے ساتھ بدسلوکی سے ناراض ہوکر 11جون سے ہی جونیئر ڈاکٹر ہڑتال پر ہیں۔کل شام وزیرا علیٰ ممتا بنرجی سے ملاقات کے بعد جونیئر ڈاکٹروں نے ہڑتال ختم کرنے کا اعلان کیا ۔کلکتہ شہر کے تمام سرکاری اسپتال این آر ایس، ایس ایس کے ایم اسپتال، آرجی کار میڈیکل اسپتال و کالج، چترنجن میڈیکل کالج و اسپتال اور کلکتہ میڈیکل کالج و اسپتال میں اوپی ڈی اور ایمرجنسی میں لمبی لمبی قطار ہے ۔آر جی کار میڈیکل کالج واسپتال کے بکنگ آفیسر نے کہا کہ ایک ہفتہ تک کام کاج ٹھپ ہونے کے سبب ایسی قطاریں ہیں۔ وزیر اعلی کے ساتھ ریاستی سیکریٹریٹ نوبنو میں جونئیر ڈاکٹروں کے 31نمائندوں کے درمیان 90منٹ تک میٹنگ ہوئی۔اس میٹنگ میں 14میڈیکل کالج کے نمائندے اور دو سینئر ڈاکٹر موجودتھے ۔وزیر اعلیٰ کے سامنے `12نکاتی مطالبہ پیش کیا جسے وزیر اعلیٰ ممتا بنرجی نے منظور کرلیا۔ پوری میٹنگ کی کارروائی کو لائیو نشر کیا گیا تھا۔اس میٹنگ میں ڈی جی پی ویرنندر،کلکتہ پولس کمشنر رانوج شرماودیگر افسران موجودتھے ۔اس موقع پر وزیرا علیٰ ممتا بنرجی نے کئی اہم اعلانات کئے جس میں تمام سرکاری اسپتالوں میں نوڈل آفیسر کی تقرری شامل ہے ۔