پورٹ ۔ اینڈ ۔ پرنس ۔ 5 اگست (ایجنسیز) ریاست ہائے متحدہ امریکہ نے پیر کے روز ہیٹی میں اپنے سفارتخانے کے قریب شدید فائرنگ کی آواز سننے کے بعد سیکورٹی الرٹ جاری کر دیا۔امریکی محکمہ خارجہ نے ایک بیان میں کہا کہ امریکی حکومت کے اہلکاروں نے سفارتخانہ کے احاطے کے باہر تمام سرکاری نقل و حرکت روک دی ہے۔ لوگوں کو ہیٹی کے دارالحکومت پورٹ۔او۔ پرنس کے علاقہ تبارے سے بچنے کا مشورہ دیا گیا ہے۔ ہیٹی بحرِ اوقیانوس اور مغربی نصف کرہ کا غریب ترین ملک ہے جو جرائم پیشہ گروہوں کے تشدد میں اضافے کی لپیٹ میں ہے۔ اس کا کچھ حصہ حریف مسلح گروہوں کے کنٹرول میں ہے جو قتل، عصمت دری اور اغوا کی وارداتیں کرتے ہیں۔اقوامِ متحدہ کے ہائی کمشنر برائے انسانی حقوق نے کہا کہ اس سال کی پہلی ششماہی میں کم از کم 3,141 افراد ہلاک ہو چکے ہیں کیونکہ جرائم پیشہ عناصر کے تشدد نے ملک کو مزید عدم استحکام کا شکار کر دیا ہے۔
ایران میں گرمی کی شدید لہر
دفاتر بند کرنے کا حکم
تہران ۔ 5 اگست (ایجنسیز) ایران کے 31 میں سے کم از کم 15 صوبوں میں سرکاری دفاتر مکمل طور پر بند یا محدود اوقات میں کام کریں گے۔ متاثرہ صوبوں میں شمال مغرب کے مغربی آذربائیجان اور اردبیل، جنوب کا ہرمزگان، شمال کا البرز، اور دارالحکومت تہران شامل ہیں۔ایران کی سرکاری ٹی وی نے تہران کے گورنر محمد صادق معتمدیان کے حوالے سے بتایا کہ یہ بندشیں وزارت توانائی کی درخواست پر کی جا رہی ہیں تاکہ ”پانی اور بجلی کے شعبوں میں توانائی کے استعمال کو منظم کیا جا سکے۔‘‘سرکاری بیان میں مزید کہا گیا ہے کہ ہنگامی اور لازمی خدمات معمول کے مطابق جاری رہیں گی۔وسط جولائی سے جاری شدید گرمی نے ایران کے بجلی کے نظام کو شدید متاثر کیا ہے، جس کے نتیجے میں ملک بھر میں وقفے وقفے سے بجلی کی بندش ہو رہی ہے، خاص طور پر جنوبی علاقوں میں جہاں درجہ حرارت 50 ڈگری سینٹی گریڈ سے تجاوز کر گیا ہے۔تہران میں حکام نے پانی کے ذخائر کی سطح میں کمی کے باعث پائپ لائنز کے پانی کے دباؤ کو بھی کم کر دیا ہے۔ ایرانی میڈیا کے مطابق، ملک اس وقت صدی کی بدترین خشک سالی کا سامنا کر رہا ہے۔