ناگپور۔12 نومبر ( سیاست ڈاٹ کام ) ہندوستانی فاسٹ بولر دیپک چہر نے بنگلہ دیش کے خلاف فیصلہ کن ٹوئنٹی 20 میچ میں اپنے مین آف دی میچ منتخب ہونے پر خوشی کا اظہار کرتے ہوئے کہا ہے کہ انہیں آخر کار برسوں کی محنت کا پھل حاصل ہو گیا ہے۔دیپک نے اپنے کیریئر کا بہترین مظاہرہ کرتے ہوئے 3.2 اوور میں محض سات رن پر چھ وکٹ کی شاندار کارکردگی کا مظاہرہ کیا تھا اور مین آف دی میچ بھی رہے۔ اسی کے ساتھ ہندوستان نے تین میچوں کی ٹوئنٹی 20 سریز کو 2-1 سے جیت لیا۔راجستھان کے 27 سالہ فاسٹ بولر نے اسی کے ساتھ سری لنکا کے اجنتا مینڈس کے سال 2012 میں زمبابوے کے خلاف آٹھ رنز پر چھ وکٹ گزشتہ ٹوئنٹی 20 کے بہترین کارکردگی کو پیچھے چھوڑ دیا۔ چہر نے اسی کے ساتھ سیریز میں جملہ 56 رنز پر آٹھ وکٹ کی بدولت مین آف دی سیریز کا ایوارڈ بھی جیتا۔میچ کے بعد انہوں نے کہاکہ میں نے کبھی خواب میں بھی اس کے بارے میں نہیں سوچا تھا۔ میں بچپن سے ہی اس کے لیے محنت کر رہا ہوں اور آج مجھے اس کا پھل مل گیا۔ چہر نے میچ میں لٹن داس اور سومیا سرکار کو آوٹ کرنے کے بعد محمد جیمنی کو آوٹ کیا۔ اس کے بعد انہوں نے آخری تین بیٹسمینوںکو ہیٹ ٹرک کا شکار بنایا اور ٹوئنٹی 20 میں ہیٹ ٹرک کرنے والے ہندوستان کے پہلے کرکٹر بن گئے جبکہ ٹی 20 میں مجموعی طور پر وہ یہ کامیابی حاصل کرنے والے 12 ویں کھلاڑی ہیں۔ چہر نے کہاکہ روہت کا منصوبہ مجھے اہم اوور دینے کا تھا اور مینجمنٹ بھی ایسا ہی چاہتا تھا۔ میں ہمیشہ اگلی گیند کے بارے میں سوچتا ہوں اور میں نے وہی کیا اور میں نے ہیٹ ٹرک کے لئے بھی یہی کیا اور اپنا اوور مکمل کیا۔
