ایڈیلیڈ۔27 نومبر (سیاست ڈاٹ کام ) سابق کپتان اسٹیو اسمتھ نے پاکستان کے خلاف پہلے ٹسٹ میچ میں یاسر شاہ کی جانب سے آؤٹ کرنے کے بعد کیے گئے اشارے کو سنجیدگی سے لیتے ہوئے اگلے میچ میں زیادہ رنز بنانے کا عزم ظاہر کیا ہے۔ برسبین میں کھیلے گئے سیریز کے پہلے ٹسٹ میچ میں پاکستان کو آسٹریلیا کے خلاف یکطرفہ مقابلے کے بعد اننگز اور 5رنز سے شکست کا منہ دیکھنا پڑا تھا۔ میچ میں ڈیوڈ وارنر اور لبوشین کے ساتھ جو برنز نے بھی پاکستانی بولروں کی درگت بناتے ہوئے اپنی ٹیم کو 580رنز کے مجموعے تک رسائی دلائی تھی لیکن ایشز سیریز میں رنز کے انبار لگانے والے اسمتھ ناکامی سے دوچار ہوئے تھے۔ اسمتھ میچ میں صرف 4 رنز بنانے کے بعد یاسر شاہ کو وکٹ دے بیٹھے تھے اور یاسر نے انہیں آؤٹ کرنے کے بعد انگلیوں سے 7 اشارہ کیا تھا۔ یاسر کا یہ اشارہ کرنے کا مقصد یہ ظاہرکرنا تھا کہ وہ اب تک ٹسٹ میچوں میں اسمتھ کو 7مرتبہ نشانہ بنا چکے ہیں۔ اسمتھ کو یاسر کا یہ انداز زیادہ پسند نہ آیا اور انہوں نے اس پر غصہ کرنے کے بجائے اسے چیلنج کے طور پر لیتے ہوئے اگلے میچ میں زیادہ سے زیادہ رنز کرنے کو ہدف بنا لیا ہے۔ انہوں نے کہا کہ اب میں یاسر شاہ کے خلاف محتاط رہوں گا اور اب میری کوشش ہوگی کہ میں ان کے خلاف آؤٹ نہ ہوں جبکہ میں ان کے خلاف مزید ڈسپلن سے بیٹنگ کروں گا۔ سابق کپتان نے کہا ہے کہ برسبین میں یاسر نے بہت اچھی بولنگ کی، انہیں وکٹ سے ڈرفٹ اور اسپن مل رہا تھا لیکن اگلے میچ میں انہیں اچھے طریقے سے کھیلنے کی کوشش کریں گے۔ یاسر شاہ کی جانب سے کیے گئے اشارے پر اسمتھ نے کہا کہ یہ بہت دلچسپ ہے، وہ مجھے چند مرتبہ آؤٹ کرنے میں کامیاب رہے، میں ان 7 میں سے چند مرتبہ جارحانہ انداز میں کھیلتے ہوئے آؤٹ ہوا، چند مواقع پر میں دوسری اننگز میں عجیب و غریب شارٹ کھیلتے ہوئے آؤٹ ہوا لہٰذا میں زیادہ پریشان نہیں ہوں۔ واضح رہے کہ اس سے قبل 2014 میں یاسر نے اسمتھ کو 4 مرتبہ آؤٹ کیا تھا اور پھر 2017 کے دورہ آسٹریلیا میں تین مرتبہ آسٹریلیائی کپتان کو نشانہ بنایا تھا۔
