دوحہ ۔ فیفا ورلڈ کپ کے سیمی فائنل میں پہلی مرتبہ پہنچنے والی مراقش کی ٹیم کے خلاف اب تک حریف ٹیموں کے گول کی تعداد جان کر مداح حیرانی کا اظہار کر رہے ہیں کیونکہ اس نے ورلڈ کپ میں اب تک حریف ٹیم کو صرف ایک گول بنانے کا موقع دیا ہے ۔ فیفا ورلڈ کپ کے کوارٹر فائنل میں مراقش نے پرتگال کو 0-1 سے شکست دے کر پہلی مرتبہ سیمی فائنل میں جگہ بنائی جس کے بعد مراقش ورلڈ کپ کی تاریخ میں سیمی فائنل میں پہنچنے والی پہلی عرب اور پہلی افریقی ٹیم بھی بن گئی ہے۔ اس تاریخی جیت کے لیے مراقش کے گول کیپر یاسین بونو نے بہت ہی اہم کردار ادا کیا ہے اور وہ حریف ٹیموں کیلئے ایک مضبوط دیوار بن چکے ہیں۔ فٹبال ورلڈ کپ کے سیمی فائنل تک پہنچنے کے لیے مراقش نے 5 میچ کھیلے جن میں سے صرف ایک میچ میں مخالف ٹیم اس کے خلاف گول کرنے میں کامیاب ہوئی ہے۔ مراقش نے کروشیا کے خلاف ورلڈ کپ میں پہلا گروپ میچ کھیلا تھا جس میں دونوں ٹیمیں کوئی گول نہ کر سکیں اور یہ مقابلہ برابر ہوا تھا۔ دوسرے میچ میں مراقش نے بیلجیئم کو 0-2 سے ہرایا تھا، اس میچ میں یاسین بونو طبیعت کی خرابی کے باعث شریک نہیں تھے اور ان کی جگہ دوسرے گول کیپر نے ذمے داریاں نبھائی تھیں۔ گروپ کے آخری اور اہم میچ میں مراقش نے کینیڈا کو 1-2 سے شکست دی تھی۔ پری کوارٹر کے ناک آوٹ اور بڑے میچ میں مراقش اور اسپین کے درمیان فتح کا فیصلہ پینلٹی ککس پر ہوا جس میں مراقش نے 3 گول کیے جب کہ مخالف ٹیم کوئی گول نہیں کر سکی تھی۔ کوارٹر فائنل میں مراقش نے پرتگال کو 0-1 سے شکست دی، اس میچ میں بھی یاسن بونو نے پرتگال کے کئی زبردست حملوں کو جو یقینی گول بن سکتے تھے، ناکام بنا کر اپنی ٹیم کی فتح میں نمایاں کردار ادا کیا اور حملوں میں رونالڈو جیسے کھلاڑی کے بھی بہت ہی قریبی حملے شامل تھے ۔
