سرینگر ۔ کشمیری قائد یاسین ملک کی اہلیہ مشعال ملک نے نریندر مودی کو خط لکھا ہے، جس میں انہوں نے کہا کہ یاسین ملک کو کچھ ہوا تو ذمہ داری حکومت پر عائد ہوگی۔ وزیراعظم کے نام خط میں مشعال ملک نے کہا کہ میرے شوہر اس وقت جیل میں ہیں۔ یاسین ملک کشمیریوں کی توانا آواز اور عدالتی ٹرائل میں ناانصافی و عمر قید کی سزا کے بعد بھوک ہڑتال پر ہیں۔ انہوں نے کہا کہ یاسین ملک کے خلاف جاری ٹرائل ناانصافی اور جمہوری نظام کے برعکس ہے۔ خط کے متن میں مزید لکھا ہے کہ مسلسل قید و تشدد کے باعث یاسین ملک کو کئی بیماریاں لاحق ہوچکی ہیں۔ کیس کی تاریخ کے دوران یاسین ملک نے متعدد بار عدالت میں موجود ہونے کی درخواست کی لیکن حکام نے ان کی موجودگی کے بغیر جرح کی جس سے اندازہ ہوتا ہے کہ یاسین ملک کے خلاف یکطرفہ ٹرائل کیا جارہا ہے۔
