نئی دہلی،13نومبر(سیاست ڈاٹ کام) کانگریس نے چہارشنبہ کے روز کرناٹک کے 17 باغی اراکین اسمبلی کو نااہل قرار دینے سے متعلق سپریم کورٹ کے فیصلے کو درست ٹھہرایا۔اس نے کہا کہ اس سے واضح ہو گیا کہ بھارتیہ جنتا پارٹی (بی جے پی) نے ریاست میں کانگریس اور جنتادل سیکولر(جے ڈی ایس) کی منتخب حکومت کوچالبازی سے جبراً گرایا تھا لہٰذا وزیر اعلیٰ بی ایس یدیورپا کی قیادت والی حکومت کو فوراً برخاست کیا جانا چاہیے ۔ کانگریس میڈیا سیل کے انچارج رندیپ سنگھ سرجے والا نے کہا کہ اس فیصلے سے واضح ہو گیا کہ بی جے پی نے کرناٹ میں اتحاد کی حکومت کو گراکر غیر آئینی حکومت سازی کی تھی۔ قانون اور آئین کے نقطہ نظر سے کرناٹک میں ایک ‘ناجائز’ حکومت چل رہی ہے اور اسے فوراً برخاست کیا جانا چاہیے ۔ مسٹر سرجے والا نے الزام عائد کیا کہ کرناٹک میں اراکین اسمبلی کی خرید و فروخت کرکے حکومت بنائی گئی تھی۔اب اس دسیسہ کاری کی حقیقت طشت از بام ہوچکی ہے لہٰذا مسٹر یدی یورپا کی ٹیپ پر ریکارڈ باتوں کی تفتیش ہونی چاہیے ۔انہوں نے سوال کیا کہ اراکین اسمبلی کی خرید و فروخت کے لیے یہ سارا کالا دھن کہاں سے آیا؟ بی جے پی کی قیادت نے اس میں کیا کردار ادا کیا تھا؟ انہوں نے مطالبہ کیا کہ اس پورے سازش کی تفتیش ہونی چاہیے ۔ترجمان نے وزیراعظم نریندر مودی کو ہدفِ تنقید بناتے ہوئے کہا کہ وہ برابرشفاف سیاست کی دہائی دیتے ہیں اس لیے انھیں ہمت سے کام لیتے ہوئے یدیورپا حکومت کو برخاست کرنا چاہیے ۔
