تل ابیب، 9 اکتوبر (یو این آئی) اسرائیلی وزیرخزانہ بیزلیل سموٹریچ نے کہا ہے کہ غزہ سے یرغمالیوں کی واپسی کے بعد حماس کو تباہ کردینا چاہیے ۔ عرب میڈیا کے مطابق اسرائیلی وزیرخزانہ نے کہا کہ یرغمالیوں کی واپسی کے فوراً بعد اسرائیل کی ریاست حماس کے حقیقی خاتمہ اور غزہ کے حقیقی تخفیف اسلحہ کے لیے اپنی پوری طاقت کے ساتھ کوششیں جاری رکھے گی تاکہ یہ اسرائیل کے لیے مزید خطرہ نہ رہے ۔ بیزلیل سموٹریچ نے کہا کہ غزہ جنگ کے خاتمے کے لیے حماس سے جنگ بندی کے حق میں ووٹ نہیں دوں گا۔ واضح رہے کہ اسرائیل اور حماس نے امریکہ کے مجوزہ غزہ امن معاہدے کے پہلے مرحلے پر اتفاق کرلیا ہے ۔ امریکی صدر ڈونلڈ ٹرمپ نے سوشل میڈیا پر جاری پیغام میں اعلان کیا کہ اس معاہدے کے تحت تمام یرغمالیوں کی جلد رہائی عمل میں لائی جائے گی ۔
