صنعا 12 اپریل ( سیاست ڈاٹ کام ) یمن میں حوثی ملیشیا کی صنعاء میں قائم ایک عدالت نے پانچ سال سے محروس چار صحافیوں کو حکومت کا دفاع کرنے پر سزائے موت کا حکم دیا ہے۔ اطلاعات کے مطابق سزا پانے والے صحافیوں کے وکیل عبدالمجیدہ صبرہ نے بتایا کہ صنعاء کی فوجی عدالت کے جج محمد مفلح نے کل ملزمان کی عدم موجودگی میں یہ فیصلہ سنایا۔ عدالتی فیصلے میں 10 صحافیوں کو پیش کیا گیا۔ایڈووکیٹ صبرہ نے فیس بک پر ایک بیان میں کہا کہ عدالت نے چار صحافیوں عبدالخالق احمد عبدہ عمران، اکرم صالح الولیدی، حارث صالح حمید اور توفیق محمد ثابت المنصوری کو جاسوسی اور حکومت کا ساتھ دینے کے الزام میں بغاوت کا مرتکب قرار دے کر انہیں سزائے موت سنائی۔عدالت نے دیگر صحافیوں ھشام طرموم، ھشام الیوسفی، ھیثم راوح الشھاب، ھشام بلغیث، حسن عناب اور صلاح القاعدی کو تین سال پولیس نگرانی میں رکھنے کا حکم دیا ۔خیال رہے کہ حوثی ملیشیا نے پانچ سال پیشتر دس صحافیوں کو اغوا کے بعد انہیں عقوبت خانوں میں غیرانسانی تشدد کا نشانہ بنایا۔ ان تمام کو گذشتہ پانچ سال سے حراست میں رکھا گیا تھا اور اب انہیں سزائے موت سنادی گئی ہے ۔