تل ابیب ۔30 جولائی ۔ ( ایجنسیز ) اسرائیلی فوج کا کہنا ہے کہ اس نے یمن سے اسرائیل کی جانب داغا گیا ایک میزائل مار گرایا، جس کے نتیجے میں اسرائیل کے مختلف علاقوں میں سائرن بجنے لگے۔اسرائیلی فوج کے عربی زبان میں ترجمان اویخائے ادرعی نے منگل کے روز سوشل میڈیا پلیٹ فارم ’’ایکس‘‘ پر لکھا کہ یمن سے داغا گیا ایک میزائل مار گرایا گیا جس کی وجہ سے ملک کے کئی علاقوں میں سائرن بج اٹھے۔عینی شاہدین کے مطابق بیت المقدس میں دھماکوں کی آوازیں سنی گئیں۔اس حوالے سے اسرائیلی چینل2 نے بتایا ہے کہ یمنی میزائل کو روکنے کیلئے دو دفاعی میزائل داغے گئے، جن میں سے ایک اسرائیلی جبکہ دوسرا امریکی ’تھاڈ‘ نظام سے چھوڑا گیا۔
