ابدو مہدی کے خاندان کو 85 لاکھ روپے بلڈ منی کی پیشکش‘16جولائی کو پھانسی مقرر
نئی دہلی ۔10؍جولائی ( ایجنسیز ) یمن میں ہندوستان کی نرس نمیشا پریہ کو پھانسی سے بچانے کیلئے آخری داؤ لگایا گیا ہے اور آخری کوشش کی جارہی ہے۔ اس کے ذریعہ نمیشا کے خاندان کی جانب سے ابدو مہدی کے خاندان کو 1 ملین ڈالر (قریب 85 لاکھ روپے) دینے کی پیشکش کی گئی ہے۔ دراصل نمیشا کو ابدو کے قتل معاملے میں پھانسی پر چڑھانے کی سزا سنائی گئی ہے۔یمن کے قانون کے مطابق اگر ابدو کا خاندان ’بلڈ منی‘ لے کر مان جاتا ہے تو نمیشا کو پھانسی پر نہیں چڑھایا جائے گا۔ نمیشا کی ماں کو امید ہے کہ ابدو مہدی کا خاندان بلڈ منی لے کر مان جائے گا۔ یمن کی عدالت نے مہدی قتل معاملے میں نمیشا کو 16 جولائی کو پھانسی دینے کا فیصلہ سنایا ہے۔ عدالت کے مطابق نمیشا اپنے پارٹنر مہدی کو مارنے میں سیدھے طور پر شامل تھی اس لیے اسے پھانسی کی سزا سنائی گئی ہے۔یعنی 16 جولائی سے پہلے اگر ’بلڈ منی‘ پر بات نہیں بنتی ہے تو نمیشا کو پھانسی مقرر کر دی جائے گی۔ نمیشا کو بچانے کیلئے ان کی ماں کیرالہ سے وہیں پر ڈیرہ ڈالے ہوئی ہیں۔ نمیشا کو بچانے کیلئے ایک گروپ بھی یمن میں تیار کیا گیا ہے۔واضح رہے کہ 2008 میں کیرالا سے نرس کی نوکری کرنے یمن گئی نمیشا کو 2017 میں گرفتار کیا گیا تھا۔ اسی سال مہدی کا قتل ہوا تھا اور اس کی نعش برآمد کی گئی تھی۔ پولیس کے مطابق نمیشا نے ڈرگس دے کر مہدی کا قتل کر دیا اور پھر اس کی نعش کو پانی کی ٹنکی میں ڈال دیا۔نمیشا کے وکیل کے مطابق مہدی اس کا بزنس پارٹنر تھا اور ایک دن اس نے اچانک اس کے ساتھ جسمانی بدسلوکی کی‘ پاسپورٹ چھین لیا اور اسے بندوق دکھا کر دھمکی دی۔ پاسپورٹ واپس لینے کیلئے نمیشا نے اسے بیہوشی کا انجکشن لگایا لیکن وہ اوور ڈوز ہو گیا۔نمیشا کی ماں نے ایک انٹرویو میں بتایا ہے کہ مقدمہ لڑنے میں اس کا پورا گھر فروخت ہو گیا ہے، اب نمیشا کو بچانے کے لیے کراؤڈ فنڈنگ کا سہارا لیا جا رہا ہے۔ بلڈ منی کیلئے جیسے ہی مہدی کا خاندان راضی ہوجاتا ہے، ویسے ہی اسے پیسے دے دیئے جائیں گے۔ اب سب کچھ مہدی کے خاندان کے ہاتھ میں ہے۔