دبئی ۔متحدہ عرب امارات میں مقیم غیر ملکیوں کو اقامہ تجدید کروانے کے لیے تین ماہ کی مہلت دی گئی ہے۔اس کے ساتھ ہی جن غیر ملکیوں کے وزٹ ویزے کی معیاد ختم ہو گئی ہے انہیں متحدہ عرب امارات سے نکلنے کی 10 اگست تک کی مہلت دی گئی ہے جبکہ بیرون ملک اقامہ ہولڈر غیر ملکیوں کو واپس آنے کے بعد تجدید کے لیے ایک ماہ کی مہلت ہو گی۔میڈیا کے مطابق محکمہ اقامہ کے ترجمان بریگیڈیئر خمس الکعبی نے کہا ہے کہ کورونا وائرس کے باعث دسمبر تک اقاموں اور ویزوں کی توسیع کا فیصلہ کابینہ نے منسوخ کرتے ہوئے تمام غیر ملکیوں کو تجدید کی ہدایت دی تھی، اس پرعمل کروانے کے لیے مہلت کا دورانیہ مقررکیاگیا ہے۔ انہوں نے کہا ہے کہ یکم مارچ اور اس کے بعد کی تاریخوں میں جن غیر ملکیوں کے اقامے ختم ہوگئے ہیں وہ پہلی فرصت میں تجدید کروالیں، ان سے تاخیر پرکوئی جرمانہ نہیں لیا جائے گا۔رہے وہ اقامہ ہولڈر افراد جو بیرون ملک میں ہیں اور پروازوں کی معطلی کی وجہ سے واپس نہیں آ سکے اور اس دوران ان کے اقامے ختم ہوگئے، انہیں واپس آنے کے بعد تجدید کے لیے ایک ماہ کی مہلت دی جائے گی جس کا آغاز واپسی کی تاریخ سے ہوگا۔انہوں نے مزید کہا ہے کہ جوغیر ملکی امارات میں وزٹ ویزے پر موجود ہیں اور ان کا ویزا یکم مارچ یا اس کے اس بعد ختم ہوگیا ہے انہیں چاہئے کہ وہ ایک ماہ کے اندر ملک سے چلے جائیں۔وزٹ ویزے کے حامل افراد کو دی جانے والی مہلت کا آغاز 12 جولائی سے بڑھ کر مہلت کی مدت کی آخری تاریخ 10 اگست ہو گی، وہ نئے ویزے پر کسی بھی وقت واپس آ سکتے ہیں۔
