بحالی کا پیاکیج بروقت ہونا ایک بڑی کامیابی : صدر فرانس میکرون
برو سیلز ۔ یوروپی یونین کے رکن ملکوں نے کورونا وائرس کے سبب متاثر ہونے والی معیشت کی بحالی کیلئے 750 ارب یورو کے امدادی پیکج پر اتفاق کر لیا ہے۔بیلجیم کے دارالحکومت برسلز میں جاری چار روزہ مذاکرات کے بعد یوروپی یونین کے قائدین نے منگل کو اقتصادی پیکج پر اتفاق کیا۔اقتصادی بحالی کے معاہدے کے تحت 390 ارب یورو کرونا وائرس سے متاثرہ ملکوں کو امداد کی مد میں دیئے جائیں گے جبکہ 360 ارب یورو قرض کی شکل میں تقسیم ہوں گے۔یورپین کمیشن متاثرہ ملکوں میں رقم کی تقسیم کا ذمہ دار ہو گا جب کہ متاثرہ ملکوں میں اس رقم کے استعمال پر تحفظات کی صورت میں یونین کے 27 ملک اکثریتی بنیاد پر مداخلت کر سکیں گے۔یوروپی یونین کے ممبر ممالک کے رہنماؤں کی جانب سے منظور کردہ پیکج پر مزید تیکنیکی بات چیت کیلئے اس پیکج کی یورپی پارلیمنٹ سے بھی منظوری درکار ہے۔ جمعرات کو یورپین پارلیمنٹ کے اجلاس میں اس پیاکیج کی توثیق کا امکان ظاہر کیا جا رہا ہے۔اقتصادی پیکج کا ایک بڑا حصہ یورپ کے اْن ملکوں پر خرچ ہو گا جن کی معیشت کرونا وائرس سے شدید متاثر ہوئی ہے۔ ان ملکوں میں اسپین اور اٹلی نمایاں ہیں جنہوں نے پیکج پر یونین کے دیگر ملکوں کی حمایت حاصل کرنے کیلئے بھرپور لابنگ کی تھی۔اسپین میں اب تک کرونا کے ڈھائی لاکھ سے زیادہ اور اٹلی میں بھی لگ بھگ ڈھائی لاکھ کیسیس رپورٹ ہو چکے ہیں۔ اسی طرح جرمنی میں دو لاکھ اور فرانس میں ڈیڑھ لاکھ سے زیادہ کیسیس سامنے آ چکے ہیں۔سوئیڈن، بیلجیم، یوکرائن، نیدرلینڈز، پرتگال، پولینڈ اور دیگر یورپی ملکوں میں کرونا کیسیس کی تعداد ایک لاکھ کے اندر اندر ہے اور بیشتر ملکوں میں کاروباری سرگرمیاں بحال ہیں۔کورونا سے متاثرہ یورپی ملکوں کے لیے اقتصادی پیکج پر مذاکرات کے دوران کئی قائداپنے اپنے موقف پر ڈٹے ہوئے تھے اور کسی نتیجے پر نہ پہنچنے کے باعث مذاکرات چار دن اور چار راتوں تک جاری رہے۔27 ملکوں پر مشتمل یورپی یونین کے مذاکرات کے دوران نیدرلینڈز نے کئی مواقع پر اجلاس سے واک آؤٹ کی بھی دھمکی دی۔ تاہم جرمنی اور فرانس نے دیگر ملکوں کو معاہدے پر متفق کرنے میں اہم کردار ادا کیا۔صدرفرانس ایمانوئل میکرون نے اقتصادی بحالی کے پیکج کو بڑی کامیابی اور اس دن کو تاریخی قرار دیا ہے۔گروپ میں شامل شمالی یورپی ممالک نیدرلینڈز کی سربراہی میں پیکج کی مخالفت کر رہے تھے اور اسے غیر ضروری قرار دے رہے تھے۔یوروپی کونسل کے صدر چارلز مائیکل نے منگل کو اپنے ایک ٹوئٹ میں کہا ہے کہ ہم نے کر دکھایا اور بحالی کے پیکج پر ایک معاہدہ کر لیا۔ ان کے بقول یہ ایک پائیدار معاہدہ ہے جس کی خاص بات یہ ہے کہ یہ درست وقت پر طے ہوا ہے۔