بروسیلز۔24جولائی(سیاست ڈاٹ کام)یوروپی یونین کی کمشنر تجارت سیسیلیا مالمسٹروم کا کہنا ہے کہ یوروپ اور امریکہ کے درمیان محدود تجارتی معاہدے کا منصوبہ اب بھی برقرار ہے ۔ تاہم تجارتی سربراہ کا کہنا ہے کہ اگر امریکہ ان کی گاڑیوں پر ڈیوٹیز میں اضافہ کرے گا تو امریکی اشیا پر بھی 35 ارب یورو کے اضافی ٹیرف لگائے جائیں گے ۔نو منتخب رکن یوروپی پارلیمنٹ کے لیے بیان میں ان کا کہنا تھا کہ واشنگٹن کی چین سے تجارتی جنگ توجہ کا مرکز ہے مگر بحراوقیانوس کے پار بھی کشیدگی موجود ہے ۔انہوں نے یوروپی پارلیمنٹ کے کمیٹی اجلاس سے خطاب کرتے ہوئے کہا کہ‘‘ہم منضبط تجارت، کوٹہ یا بر آمداتی رکاوٹیں برداشت نہیں کریں گے اور اگر ٹیرف لگائے گئے تو ہمارے پاس بھی حساب برابر کرنے کا اختیار ہے ‘‘۔ ان کا کہنا تھا‘‘’ہم نے اسے پہلے ہی تیار کرلیا ہے جس کی لاگت 35 ارب یورو 39 ارب ڈالر ہے ، امید کرتا ہوں کہ اسے استعمال کرنے کی ہمیں ضرورت نہیں پڑے گی ‘‘۔ واضح رہے کہ امریکی صدر ڈونالڈ ٹرمپ نے یوروپی گاڑیوں کو قومی سلامتی کیلئے خطرہ قرار دیا ہے اور وہ آٹو موبائل کی درآمدات پر ڈیوٹیز عائد کرنے پر غور کر رہے ہیں۔