برسلز : یوروپی یونین (ای یو)نے منگل کے روز اپنی سرحدیں کھولنے سے متعلق فہرست کی ایک بار پھر سے تجدید کی لیکن سربیا اور مونٹے نیگرو میں کووڈ 19 کے بڑھتے ہوئے مریضوں کی وجہ سے انھیں فہرست سے باہر کردیاگیاہے ۔پرانی فہرست میں شامل 13غیر ای یو ملکوں کو نئی فہرست میں ایک بار پھر سے جگہ ملی ہے ۔سربیا اور مونٹے نیگرومیں گزشتہ کچھ دنوں میں کورونا کے معاملوں میں اضافہ ہواہے ۔سربیا نے صورحال کو سازگار دیکھتے ہوئے 6مئی کو طبی ایمرجنسی ہٹالی تھی لیکن گزشتہ کچھ دنوں سے وہاں ایک بار پھر سے کورونا کے معاملوں میں اچانک اضافہ دیکھاگیاہے ۔واضح رہے کہ ای یو نے 30جون کو آسٹریلیا، الجیریا ، اروگوئے ، تیونس ، جنوبی کوریا ،سربیا ، روانڈا ،نیوزی لینڈ ، مراقش ، مونٹے نیگرو ، جاپان ، جارجیا ، کناڈا اور تھائی لینڈ کے شہریوں کو داخلے کی اجازت دی تھی ۔