برسلز: وزیر اعظم ہندوستان نریندر مودی کے فرانس دورے سے قبل یورپی پارلیمنٹ نے ہندو ستان میں انسانی حقوق کی خلاف ورزیوں پر مذمتی قرارداد منظور کرلی،یورپی پارلیمنٹ نے ہندوستان سے نسلی اور مذہبی تشدد فورا روکنے اور مذہبی اقلیتوں کو تحفظ فراہم کرنے کا مطالبہ بھی کیا۔یورپی پارلیمنٹ نے یورپی یونین اور ہندوستان کے درمیان تجارت سمیت شراکت داری کے تمام شعبوں سے انسانی حقوق کو منسلک کرنے کے مطالبے کا بھی اعادہ کیا ہے،یورپی قرارداد میں کہا گیا ہے کہ ہندوستان میں عدم برداشت نے ریاست منی پور کے نسلی فسادات میں اہم کردار ادا کیا۔ہندوستان میں ہندو اکثریت پسندی کو بڑھاوا دینے والی تفرقہ انگیز پالیسیوں پر تشویش ہے،قرارداد میں یورپی یونین کے رکن ممالک سے ہندوستان میں آزادی اظہار اور مذہبی آزادی کیلئے اعلی سطح پر آواز اٹھاتے رہنے کا بھی کہا گیا ہے،ریاست منی پور میں جاری نسلی و مذہبی فسادات میں اب تک 142سے زیادہ ہلاک اور 54ہزار سے زیادہ افراد بے گھر ہو گئے ہیں۔