برسلز : یورپی یونین کمیشن کی صدر ارسلا وون ڈیر لیین نے کہا ہے کہ روس قدرتی گیس کی ترسیل روک کر آسٹریا اور یورپ کو بلیک میل کر رہا ہے۔وون ڈیر لیین نے اپنے سوشل میڈیا اکاؤنٹ پر روسی توانائی کمپنی گازپروم کی جانب سے آج سے آسٹریا کو قدرتی گیس کی ترسیل روکنے پر ردعمل ظاہر کیا۔اپنی پوسٹ میں وون ڈیر لیین نے کہا کہ روسی صدر ولادیمیر پوٹن توانائی کو “ہتھیار” کے طور پر استعمال کر رہے ہیں۔انہوں نے کہا کہ پوٹن گیس کی ترسیل روک کر آسٹریا اور یورپ کو بلیک میل کرنے کی کوشش کر رہے ہیں۔وون ڈیر لیین نے نشاندہی کی کہ یورپی یونین روس سے گیس کی ترسیل کی بندش اور سردیوں کے موسم کے لیے تیار ہے، انہوں نے کہا کہ پوری یورپی یونین میں قدرتی گیس کے ذخائر بھرے ہوئے ہیں۔وون ڈیر لیین نے بتایا کہ انہوں نے گیس کی بندش کے بارے میں آسٹریا کے چانسلر کارل نیہامر سے بات کی ہے اور کہا کہ یورپ آسٹریا کی حمایت کرے گا۔آسٹریا کے چانسلر نیہامر نے گزشتہ روز بتایا تھا کہ روسی توانائی کمپنی غازپروم ان کے ملک کو قدرتی گیس کی ترسیل روک دے گی۔
