بروسلز / نئی دہلی : اس سمٹ کے ایجنڈے کے مطابق مرکزی نکتہ تو کورونا وائرس کا دنیا میں پھیلاؤ اور اس کی ویکسین کی تیاری اور پھر اس کی تمام ضرورت مند افراد تک آسان رسائی ہے لیکن اس کے ساتھ انسانی حقوق کے معاملات اور علاقائی تعلقات بھی زیر غور آئیں گے۔ ان معاملات میں پاکستان، چین اور افغانستان کے ساتھ ہندوستان کے تعلقات کا جائزہ بھی لیا جائے گا۔ یورپ کی جانب سے اس سمٹ میں مذاکرات کی قیادت یورپین کونسل کے صدر چارلس مشل اور یورپین کمیشن کی صدر ارسلا واندر لین کر رہے ہیں جبکہ ہندوستان کی جانب سے وزیراعظم نریندرمودی شامل ہیں۔ذرائع کے مطابق اس سمٹ میں یورپ اور ہندوستان کے درمیان فری ٹریڈ ایگریمنٹ ہونے کا کوئی امکان نہیں ہے۔