ایتھنز ۔ شمالی یونان میں تارکین وطن کی اسمگلنگ میں ملوث ایک کار حادثہ کا شکار ہوگئی، جس کے نتیجے میں ڈرائیور ہلاک اور تمام 9 مسافر زخمی ہوگئے۔ ڈان اخبار کی رپورٹ کے مطابق پولیس کا کہنا تھا کہ جمعرات کی شام ہوئے حادثہ میں ہلاک ہونے والے ڈرائیور کا تعلق پاکستان سے ہے اور انہیں شبہ ہے کہ پاکستانی شخص اسمگلنگ کے ریکٹ کے لیے کام کرتا تھا۔ پولیس کے مطابق زخمی ہونے والے مسافروں میں سے بھی مبینہ طور پر ایک پاکستانی اسمگلر ہے جبکہ دیگر 8 افغان باشندے ہیں۔ پولیس نے بتایا کہ گاڑی شمالی شہر کاوالا کے قریب پولیس ٹریفک چوکی پر روکی گئی تھی تاہم وہ وہاں سے تیزی سے نکل گئی تھی۔ ان کا کہنا تھا کہ بعد ازاں انتہائی تیزرفتاری کے باعث گاڑی سڑک سے نیچے چلی گئی تھی۔ حکام نے بتایا کہ تمام زخمیوں کو ہاسپٹل منتقل کردیا گیا ہے۔ واضح رہے کہ ہر سال ہزاروں تارکین وطن اور مہاجرین ہمسایہ ملک ترکی سے یونان میں داخل ہونے کی کوشش کرتے ہیں۔