لکھنؤ : اترپردیش میں عوامی شکایات کی یکسوئی کے لئے کانگریس نے مہم شروعات کی ہے۔ اجئے رائے نے اس کا آغاز کرتے ہوئے کہا کہ جن لوگوں کا کام نہیں ہو رہا ہے یا جنہیں بی جے پی حکومت ہراساں کر رہی ہے، وہ اس شکایتی باکس کے ذریعہ ہم سے براہ راست شکایت کر سکتے ہیں۔ اتر پردیش کانگریس کے صدر اجئے رائے نے کل لکھنؤ کانگریس ہیڈکوارٹر میں شکایتی باکس مہم کا آغاز کیا ہے۔ اس مہم کو کانگریس نے عوامی شکایات کے ازالے کی جانب اہم قدم قرار دیا ہے۔ ان کی شکایات پر فوری کارروائی کی جائے گی۔ صدر اجئے رائے نے کہا کہ اس وقت یوپی کی تحصیلوں اور تھانوں میں دلالوں کا غلبہ ہے، جس کی وجہ سے عوام کو اپنے کاموں کے لیے بے انتہا مشکلات کا سامنا کرنا پڑ رہا ہے۔ انہوں نے کہا کہ یہ شکایتی باکس ضلعی کانگریس کے دفاتر میں رکھا جائے گا۔ فی الحال 6 اضلاع جہاں ہمارے ایم پی ہیں، ان میں کانگریس کے دفاتر میں یہ باکس رکھے جائیں گے۔ اس کے علاوہ تین اہم اضلاع بنارس، گورکھپور، لکھنؤ کو بھی اس میں شامل کیا گیا ہے۔ ہم اس مہم کو ان اضلاع میں ایک پائلٹ پروجیکٹ کے طور پر شروع کر رہے ہیں۔ اس کے بعد دیگر اضلاع کو بھی اس سے جوڑا جائے گا۔ اتر پردیش کانگریس کے صدر نے کہا کہ ضلعی سطح کی کمیٹیوں میں وکلاء ، ریٹائرڈ افسران، میڈیا سے تعلق رکھنے والے افراد، سماجی کارکن اور کانگریس لیڈران شامل ہوں گے۔ اگر وہاں سے شکایات کا ازالہ نہ ہوا تو صوبائی کمیٹی شکایات کا ازالہ کرے گی۔ اس میں ہمارے ایم پی، ایم ایل اے اور دیگر پارٹی لیڈران شامل ہوں گے۔
