لکھنؤ:اسلام کے خلاف فرانسیسی صدر ایمینوئل میکرون کے متنازعہ تبصرے کے خلاف ملک کے مختلف حصوں کیساتھ علی گڑھ میں کل احتجاجی مظاہرے کے بعد ریاست بھر میں الرٹ جاری کردیا گیاہے ۔علی گڑھ مسلم یونیورسٹی کے طلبہ نے کل ایک جلوس نکال کر فرانسیسی صدر کے خلاف نعرے بازی کی تھی۔ مظاہرین طلبہ نے کہا تھا کہ فرانس سے درآمد شدہ کوئی بھی سامان اب نہیں خریدا جائے گا اور فرانس کی مصنوعات کا مکمل بائیکاٹ کیا جائے گا۔قابل ذکر ہے کہ فرانس میں چند روز قبل کلاس روم میں بچوں کو حضرت محمدصلی اللہ علیہ وسلم کے کارٹون دکھانے والے ایک ٹیچر کا ایک مسلم نوجوان نے سرقلم کردیا تھاجس کے بعد فرانسیسی صدر نے اسلامی شدت پسندی پر متنازعہ بیان دیتے ہوئے تمام مسلمانوں کو نشانہ بنایا تھا۔ فرانسیسی صدر کے بیان کے بعد فرانس میں مسلمانوں کے گھروں اور مساجد کے خلاف کارروائی کی گئی تھی، جس کی وجہ سے ہندوستان سمیت مختلف ممالک کے مسلمانوں میں فرانس کے خلاف ناراضگی بڑھتی جارہی ہے اور احتجاجی مظاہرے ہورہے ہیں۔اترپردیش پولیس ہیڈ کوارٹر نے تمام اضلاع کے سینئر پولیس افسران کو ہدایت دی ہے کہ وہ ان اضلاع میں مکمل نگرانی کریں جہاں ایسے مظاہرے کا امکان ہے اور کسی بھی حالت میں احتجاج نہیں ہونے دیا جائے ۔
