لکھنو: اتر پردیش میں ایک بار پھر اکثریت کے ساتھ حکومت بنانے کا یقین ظاہر کرتے ہوئے مرکزی وزیر داخلہ امیت شاہ نے کہا کہ سابقہ حکومتوں نے امن و امان کا بیڑا غرق کررکھاتھا جبکہ آج یوپی میں ترقی کی لہر ہے اور مافیا اور ناپسندیدہ عناصر دوربین سے بھی نظر نہیں آتے ۔ ڈیفنس ایکسپو گراؤنڈ ورنداون یوجنا میں ’میراپریوار-بھاجپا پریوار‘ کی رکنیت مہم کا آغاز کرتے ہوئے امیت شاہ نے جمعہ کو کہا کہ ریاست کی یوگی حکومت نے اپنے اب تک کے دورمیں 90 فیصد وعدوں کو پورا کیا ہے اور بقیہ وعدہ دوماہ میں صد فیصد پوراکرلیا جائے گا۔ انہوں نے کہا کہ یوپی میں سماج وادی پارٹی اور بہوجن سماج پارٹی کا کھیل برسوں جاری رہا۔ یہاں امن و امان کی حالت دیکھ کر ان کا خون کھولتا تھا۔ کیرانہ سے لوگ ہجرت کرگئے لیکن آج خود ہجرت کرانے والے ہجرت کرگئے ۔ مافیا اب دوربین سے بھی نظر نہیں آتا۔ یہ تبدیلی صرف بی جے پی ہی کر سکتی ہے ۔ انہوں نے یقین ظاہر کیا کہ یوپی 2022 میں دوبارہ 2017 کو دہراتے ہوئے 300 کو عبور کرنے کا ہدف حاصل کرے گی۔ امیت شاہ نے کہاکہ یوپی نے دو بار مہربانی کی، تب مرکز میں حکومت بنی، اس کا سہرا یوپی کے عظیم لوگوں کے سر جاتا ہے ۔
