نئی دہلی ۔ /25 اپریل (سیاست ڈاٹ کام) کانگریس جنرل سکریٹری پرینکا گاندھی نے ہفتہ کو زور دیا کہ اترپردیش میں کورونا وائرس کے ٹسٹ کئے جارہے ہیں جس میں شفافیت ضروری ہے کیونکہ ڈاٹا کو پوشیدہ رکھنا مہلک ثابت ہوسکتا ہے ۔ یو پی کی یوگی آدتیہ ناتھ حکومت کیلئے کووڈ۔ 19 کے پھیلاؤ روکنے کے سلسلہ میں بعض تجاویز پیش کرتے ہوئے پرینکا نے کہا کہ دنیا بھر میں ٹسٹ اس مہلک مرض سے لڑنے میں کلیدی رول ادا کررہا ہے اور اس میں تیزی لانے کی ضرورت ہے ۔ انہوں نے ہندی میں ٹویٹ کیا کہ کئی لوگوں نے یو پی میں ہورہی کورونا جانچ کے تعلق سے شکوک و شبہات کا اظہار کیا ہے ۔ کورونا وائرس کے خلاف لڑائی میں شفافیت سے کام لینا اہم عنصر ہے ۔ سارا سماج اور حکومت ملکر ہی اس وباء کو شکست دے سکتے ہیں ۔ پرینکا نے بتایا کہ یو پی نے گزشتہ دو روز سے ٹسٹنگ روک رکھی ہے ۔ اسے بڑے پیمانے پر کورونا جانچ کا احیاء کرنے کی ضرورت ہے اور تمام ڈاٹا سے عوام کو واقف کرایا جائے ۔
