برسلز ۔ 23 اگست (ایجنسیز) ناٹو سیکریٹری جنرل مارک روٹے نے کہا ہے کہ یوکرین کے تحفظ کے لیے اہم ضمانتیں درکار ہیں۔ غیرملکی میڈیاکے مطابق یوکرین کے دورے پر آنے والے ناٹو سیکریٹری جنرل مارک روٹے نے کہا کہ روس ناصرف مستقبل میں ہونے والے امن معاہدہ پر عمل کرے بلکہ یہ بھی تسلیم کرے کہ آئندہ کبھی یوکرین پر حملہ نہیں کرے گا۔ اس موقع پر یوکرین کے صدر ولادیمیر زیلنسکی نے کہا کہ یوکرین جنگ کے خاتمہ پر ملنے والی ضمانتوں میں یہ بھی طے ہونا چاہیے کہ اتحادی ممالک یوکرین کو کیا کچھ فراہم کریں گے اور یوکرین کی فوج کیسی ہونی چاہیے۔ ناٹو سیکریٹری جنرل نے کہا کہ ابھی مذاکرات کے نتائج کے حوالہ سے کچھ بھی کہنا قبل از وقت ہے، لیکن یہ ضرور ہے کہ امریکہ اس میں شامل ہوگا۔
