کیف: امریکی فوجی امداد ختم ہونے کے بعد یوکرین نے اپنے شہریوں سے گھروں میں ڈرون تیار کرنے کا مطالبہ کر دیا۔امریکہ کی جانب سے یوکرین کی فوجی امداد ختم ہونے کے بعد روس سے نبرد آزما یوکرین نے اپنی فوجی ضروریات کو پورا کرنے کیلئے عوام سے گھروں میں ڈرون تیار کرنے کا مطالبہ کر دیا ہے۔ یوکرین کے نائب وزیر اعظم اور ڈیجیٹل تبدیلی کے وزیر میخائل فیڈوروف نے کہا ہیکہ شہریوں کو ڈرون تیاری کے آن لائن کورسز کر کے روس کے ساتھ تنازعہ کے دوران ملکی فوج کی ضروریات کو پورا کرنے کیلئے گھروں میں ڈرونز کو تیار کرنا شروع کرنا چاہیے۔ فیڈروف نے فیس بک پر ایک پوسٹ میں صدر زیلنسکی کی جانب سے رواں سال 2024میں 10لاکھ یو اے وی تیار کرنے کے ہدف کو حقیقت پسندانہ قرار دیتے ہوئے کہا کہ چھوٹے، فرسٹ پرسن ویو ڈرون اس تنازعہ میں گیم چینجر بن گئے ہیں، اگر عوام حکومت کی مدد کریں تو یہ سب ممکن ہو سکتا ہے۔یوکرینی وزیر نے مزید کہا کہ فروری 2022میں شروع ہونے والی جنگ کے بعد کیف حکومت نے ڈرون بنانے والوں کو درپیش بہت سی قانونی رکاوٹوں کو دور کر دیا ہے اور ملک کی فرمیں فی الحال ڈرونز کی پیداوار بڑھا رہی ہیں۔ تاہم فرنٹ لائنز سے دور کوئی بھی شخص یوکرین کی یو اے وی (ڈرون)کے ہتھیاروں کو بڑھانے میں بھی مدد کر سکتا ہے۔
