نیویارک، 3 ستمبر (آئی اے این ایس) ہندوستان کے ٹینس اسٹار یوکی بھامبری اور ان کے نیوزی لینڈ کے پارٹنر مائیکل وینس یو ایس اوپن کے مردوں کے ڈبلز کوارٹر فائنل میں پہنچ گئے۔ 14ویں سیڈ بھامبری اور وینس نے جرمنی کے چوتھے نمبرکے سیڈز کیون کراؤویٹز اور ٹم پوئٹزکو راست سٹوں میں 6-4، 6-4 سے شکست دی۔ بھامبری جو اس وقت ہندوستان کے نمبر ون اور دنیا کے 32ویں درجہ بندی والے ڈبلز پلیئر ہیں، انہوں نے اپنے کیریئر میں پہلی بارکسی گرانڈ سلام کے کوارٹر فائنل میں جگہ بنائی ہے۔ گزشتہ سال بھامبری نے فرانسیسی کھلاڑی البانو اولیویٹی کے ساتھ یو ایس اوپن میں شرکت کی تھی اور پری کوارٹر فائنل تک پہنچے تھے، مگر وہ اسپین کے مارسل گرینولرز اور ارجنٹینا کے ہوریسیو زیبایوس کے خلاف راست سٹوں میں ہارگئے تھے۔ اس سے قبل بھامبری اور وینس نے کولمبیا کے گونزالو ایسکوبار اور میکسیکو کے میگوئل اینجل ریز۔ وارلا کی غیر سیڈ جوڑی کو ایک گھنٹہ 25 منٹ میں 6-1، 7-5 سے ہرا کر پری کوارٹر فائنل میں جگہ بنائی تھی۔ اب انڈو۔کیوی جوڑی 41 سالہ امریکی تجربہ کار راجیو رام اور ان کے کروشین پارٹنر نکولا میکٹیچ سے ٹکرائے گی، جو 11ویں سیڈ ہیں۔ رام اور میکٹیچ نے برازیل کے فرنانڈو رومبولی اور برطانیہ کے جان پیٹرک اسمتھ کو سخت مقابلے میں تین سٹس کھیل کر 6-7(7)، 7-5، 7-5 سے شکست دی۔ قابل ذکر ہے کہ رام نے اس کامیابی کے ساتھ اپنے کیریئر کی 500ویں ٹور لیول جیت بھی مکمل کی۔ انہوں نے یہ سنگ میل فلشنگ میڈوز میں حاصل کیا جہاں وہ 2021 سے 2023 تک مسلسل تین بار خطاب جیت چکے ہیں۔ رام ساتویں ایسے متحرک کھلاڑی بن گئے ہیں جنہوں نے 500 ٹور لیول ڈبلز فتوحات حاصل کی ہیں، اور وہ واحد فعال امریکی کھلاڑی ہیں جن کے پاس اتنی جیتیں ہیں۔ علاوہ ازیں ہندوستان کے تجربہ کار روہن بوپنا اور ان کے پارٹنر رومین آرنیڈو پہلے ہی راؤنڈ میں باہر ہوئے، جبکہ ارجن کادھے اور ان کے ایکواڈورین پارٹنر ڈیگو ہیڈالگو بھی پہلے راؤنڈ میں ہار گئے۔ چندرشیکھر اور وجے سندر پرسانت کی مہم بھی 6-4، 6-3 سے شکست کے بعد ختم ہوگئی۔
